【親子好去處】好好玩！DIY自己專屬的出前一丁、合味道杯麵

之前聽朋友話自己整杯麵係好好玩，不過上幾次係香港舉行嘅時候都總係夾唔到時間去玩。

多謝公關姐姐邀請，今次可以整自家杯麵之餘，仲可以玩埋全球首間「出前一丁工作坊」，一向貪玩嘅我又點會唔帶埋小小豬嚟玩返轉呀！

其實之前嘅杯麵工作坊都係定時安排係商場作限定活動，不過依家就唔洗等PLAN好時間，因為佢地已經進佔機場童夢城，所以就真係玩得方便左，想係幾時玩都冇問題啦(記得要一早上網BOOK位呀)！

我地嚟到就即刻開始動工，當然係做屬於自己嘅出前一丁啦！

其實初時都以為係玩玩下嘅活動，不過原來係好認真，因為一切都係由麵粉開始。

不過...…開始之前就一定要洗手，始終食落肚，衛生係好重要呀(當然都唔會捨得食...…哈哈哈)~

未正式開始就聽下哥哥介紹出前一丁嘅來源同埋做法先。

聽完理論就開始動手，整出前一丁第一步就係搓麵粉，將全部麵粉倒進盆內，再撥出一個小孔，倒入鹼水，之後就慢慢搓搓~

之後就可以利用木棍，由上而下咁按壓麵糰。

之後就可放入製麵機，目的就係由小小的一個麵糰，反覆放入製麵機內推壓14次，等佢可以增添麵嘅彈性。

睇住啲麵糰由製麵機出嚟，依個小小豬好興奮！

睇完我做就到小小豬，有得玩就緊係開心嘅豬仔，都算係咁啦，好努力咁攪攪攪麵糰。

只係攰嘅時候就要我幫手。

整好麵糰就要等一陣，等麵糰發酵。

就係依個時候我地就為自家出前一丁設計封面。

接住我地就將麵糰放返入去製麵機，先嚟壓薄。

之後就可以壓成出前一丁樣啦！

一頭一尾嘅麵條就冇咁靚(品質保證好重要)，所以就要剪走佢。

依個攪笑小小豬以為已經完成，仲話想帶返屋企~

當然係未得啦，因為先要由工作人員幫我地量下麵重量，一包大約100-110g，然後將麵放入爐去蒸4分鐘。

然後就可以放入150度嘅油進行「瞬間熱油乾燥法」。

小小豬話要睇住佢嘅出前一丁BB出世呀！

最後由工作人員用機器將麵袋封實。

用小小豬嘅開心同努力所製嘅自家出前一丁面世啦！

之後我地就整DIY合味道，首先就聽下姐姐介紹先啦。

都係嗰句，食落肚一定要好衛生，所以第一步就係要用酒精消毒雙手。 

之後再拎隻杯同杯蓋。

記得要拎埋張材料表。

可以從四種湯底選一款，之後就係十二款配料揀四款。其實都真係幾頭痛，樣樣都好想要，不過姐姐話要符合規格，所以係唔可以多架！

之後到最重要嘅一環，就設計杯身，一向零藝術天份小小豬都真係唔多知知畫乜，唔緊要啦...…最重要都係佢肯做同投入嘛~

一切準備就緒就可以開始啦~

首先就係由負責姐姐為我地將麵放入己消毒杯入面。

然後就加入之前揀好左嘅湯粉及配料。

之後透過壓力同熱力密封麵杯。

小小豬嘅DIY合味道出世啦！

步驟仲未完，因為我地都唔會打算食，留念為主，所以就充氣整靚靚啦~

大功告成啦！

好鍾意參加依啲落手落腳做嘅活動，真心覺得依兩個工作坊去超好玩，尤其是係出前一丁工作坊由零開始真係好似睇住別自己BB出世咁，好有滿足感呀！

我同小小豬兩個落手落腳做就緊係滿足，就連旁觀睇我哋做嘅老公都覺得好好玩，仲叫我即刻要上網登記，再帶小小豬嚟玩多一次，不過下次就由佢陪小小豬玩喎！

不過原來反應係非常熱烈，未來3個月嘅名額都已經爆滿，所以要成日上網睇住啲可接受報名時間呀！

More Information :

「我的合味道工作坊」: 票價 $30/位
「出前一丁工作坊」: 票價 $50/位(報名需要2位以上)

地址：香港國際機場T2童夢城通識學園
Website：http://mycupnoodles.com.hk