【湯水】青欖龍脷葉羅漢果海底椰湯

話說之前我完全係出唔到聲，飲左兩日鹹竹蜂都總算叫做可以把聲開返好多，同埋喉嚨痛少左好多。

好友見我唔舒服左好幾日，所以就介紹左依款湯俾我，朋友咁用心為我，真係有點感動，加上都係時候要潤返下個喉嚨，作下日常調理同預防再發病嘛。

基本上大部分材料都可以係濕貨店或山草藥店有售，有部分街市花檔都會可以買到，所以都唔難買呀！

材料有：

瘦肉約$40、龍脷葉一両(約$10)、青欖十粒、羅漢果半個、南北杏一湯匙、新鮮海底椰(又或者叫棕櫚果)3個。

做法：

1. 新鮮海底椰切開；青欖用刀背略拍扁；羅漢果壓碎

2. 新鮮海底椰有一層薄皮，千其唔好除去左，因為嗰層皮係好有益，可以化痰止咳

3. 將所有材料洗淨

4. 龍脷葉洗淨；豬肉汆水備用

5. 煲內加入約3.5L水，然後加入所有材料

6. 待水滾後以大火加蓋煲約30分鐘

7. 再轉慢火加蓋煲多1個半小時

8. 最後加少少鹽就飲得啦

入口味道甘甘甜甜，既有青欖又多左一份龍脷葉嘅味，所以都難入口。只係小小豬唔多鐘意嗰一陣青欖味，所以係佢唔多願意下只飲左一碗仔。

不過我飲完又覺嚨喉舒服左好多，痕痕癢癢嘅感覺減少啲啲，所以下次喉嚨痛可以再煲下先得(當然...…我唔希望再嚟過啦)！

溫馨提示：

由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！