【湯水】粟米鬚紅蘿蔔馬蹄水

行街市時，終於俾我見到有新鮮粟米芯鬚買，一向小小豬都係好鐘意飲粟米鬚嘅涼茶，所以我都二話不說買左一斤。

其實係今日見到又真係可以話啱晒時機，因為小小豬剛剛係學校打左小一生要打嗰支預防疫苗，係依個時候俾啲清熱解毒嘅涼茶俾佢飲，咁就可以減少發燒機會，所以就煲左粟米鬚紅蘿蔔馬蹄水俾小小豬飲啦~

粟米芯鬚加馬蹄及紅蘿蔔煲湯，味道唔洗講都一定係好鮮甜。粟米芯鬚有健脾開胃及利尿功效，紅蘿蔔就可以補血強身及滋潤解燥，馬蹄就能消食除痰，清熱解毒。將三樣加埋一齊煲涼茶，仲唔係好味又有益，啱晒各位大小朋友呀！

材料粟米鬚一斤、紅蘿蔔一條、馬蹄六粒及冰糖適量~

紅蘿蔔去皮切塊；馬蹄洗淨去皮~

粟米鬚洗乾淨~

煲內放約3L水，然後隨水加入所有材料(冰糖除外)~

待滾起後，用大火加蓋煲約15分鐘，之後再轉慢火加蓋煲多45分鐘~

最後就因應個人口味加入適量嘅冰糖，再煲多15分鐘(我個人認為只需要加一粒冰糖就足夠了)~

最後焗多15分鐘，就可以飲得啦~

小小豬就最鐘意粟米鬚水，今次加埋馬蹄及紅蘿蔔一齊煲，整杯涼荼咁甜甜，佢又點會唔鐘意呀~

今次打完預防疫苗小小豬又真係冇發燒又冇乜唔舒服，我唔敢話係依款涼茶嘅功勞，不過平日飲多啲湯水，好好調理身體，咁自然病痛都少啲啦！

溫馨提示：

- 由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！