美國總統大選雖然結果已經塵埃落定,但美國嗰邊似乎都仲有大部分人未能平復情緒,唔係太想接受如此結果。而亦因為雙方政見不同,近期喺美國嗰面分別支持共和黨及民主黨嘅朋友都因此而變得面阻阻,更有情侶、夫婦因此而令感情意外觸礁!究竟選出一個Donald Trump,可以令幾多對夫婦離婚收場呢?

最近喺美國網絡上,一位以前從來都唔支持特朗普嘅男士阿托,唔知點解喺神推鬼㧬之下,竟然態度就慢慢轉變,從以前恥笑特朗普轉為支持佢。阿托仲同佢嘅老婆解釋自己之所以轉軚,最大原因係想共和黨有番啲衝擊同轉變咁話。對於阿托突然之間嘅轉變,佢老婆當然就相當不滿,因為喺佢老婆眼中,特朗普就係一個極度種族及性別歧視嘅候選人,以及係一個前言不對後語嘅大騙子!

▼突然轉軚支持特朗普,阿托老婆聽到之後嬲到著晒火。


(圖片來源:Walid Shoebat)

更令阿托老婆火遮眼嘅係喺一個朋友聚會當中一講起特朗普,部分支持特朗普嘅阿托朋友竟然就口出狂言,講埋晒話想將LA所有墨西哥移民都遣返咁話!最過分係阿托聽到之後仲笑埋同講埋一份,佢老婆見到唔嬲就奇啦!

於是,阿托老婆就拉埋左佢埋一邊訓話,但阿托唔受落不特止,仲鬧番佢老婆轉頭話佢選擇希拉里就等於支持緊一班惡形惡相,好似納粹黨一樣橫蠻嘅女權主義者。然後仲大膽到話就係因為佢老婆呢啲人咁無知,女人更唔應該擁有選舉權!

對於阿托講出咁離譜嘅言論,佢老婆當然就嬲到即刻有事走先!而當坐喺車上面,一路喊一路諗自己老公點解會變成咁嘅事後,阿托老婆亦都決定要為左某個男人而放棄阿托,執起電話send短訊比阿托:「我地離婚吧!」

究竟美國選出左特朗普做總統之後,有幾多對情侶或者夫妻因此而出現感情問題呢?可以話你聽,阿托同佢老婆絕對唔會係唯一一對因此分開嘅夫婦囉!

(封面圖片:Faith Family America