【食譜】鮮香十足：鹽焗蝦

過了幾日假期後，大家都應該有weekday blue。

假期我過得好開心又充實又好驚喜，換言之今日就有假期後失落感。

加上假期後個個都忙工作，有心機睇食譜既人相對減少。

所以我決定今日出一個只有兩成功力既食譜。

兩成功力既意思係：你用兩成功力就做到一碟餸。

呢個係鹽焗蝦，佢同所有鹽焗既食物一樣都係只需要用鹽去焗。

做出來蝦殼當然會比較咸，但蝦用呢個方法做出來既鮮甜味相對又多一點。

放心！個蝦殼的確會咸啲，但對蝦肉無影響的。

呢個蝦就如人生一樣唔會單獨得一種味咁囉，哼～

做法簡單，材料只需要鹽、蛋白同主角：蝦！

我諗用瀨尿蝦做都一樣得的。

做法：

1. 粗鹽加2隻蛋白，當然份量係要自己預，你整1760隻蝦同我整8隻個份量一定不同。

2. 呢度大約300g粗鹽同2隻蛋白，將佢攪勻。

3. 先鋪一層蛋白鹽晌底，再放蝦、然後再鋪一層蛋白鹽掃平佢。

4. 放入焗爐160度火焗15分鐘就完成。

5. 出爐後刮走啲鹽就食得，記得剝殼啊！