【食譜】日式牛扒丼

呢幾日都留晌屋企休息，預備又再有long weekend可以吃喝玩樂。

每次假期後呀包就會累足幾日，咁我就舒服啲，否則日日夜夜都比包包纏住直到永遠......

但係咁我都堅持煮飯比大少爺食，總認為佢日頭出去工作晚上就係要有煮家飯菜等佢。

雖然大少爺唔太喜歡一碗過既飯(除了排骨飯)，但我就好鍾意研究一碗飯，因為我覺得方便又幾好味。

其實咁整又要整得好都唔係少功夫，個汁今次又係自己煮埋。

其實日式既汁唔難煮，有醬油、有味醂、有清酒、有糖已經可以。

如果大家唔想用味醂及清酒，只用醬油、水、糖已經得。

呢個日式牛扒丼堅好味，個賣相都令大少爺開心！～

材料：

薄牛扒  4件或按自己所需份量

洋蔥    整個切絲

蒜頭    3粒

法國豆  適量

飯     　適量

汁料：

醬油    1.5湯匙 (可用一半生抽、一半老抽代替)

味醂   1湯匙

清酒   1湯匙

水   3湯匙

糖   2茶匙

鹽   少許

（以上材料撈勻 *如果唔用味醂同清酒只需要加多少少糖去調味都做到效果）

另備：生粉水

做法：

1. 蒜片：我終於研究到蒜片點整最好，就係熱鑊熱油放蒜片熄火用餘溫令蒜片呈金黃！

2. 將煎過蒜片既油去煎牛扒，牛扒臨煎前灑上鹽用猛火去煎封兩邊表面，然後煎到熟為止，放至稍涼切件。

3. 用煎過牛扒既鑊去炒洋蔥及法國豆(可用其他蔬菜)

4. 之後放晒汁材料去煮，煮到滾先試味(每隻醬油味道唔同所以試下味再調較，但個汁要少許甜)

5. 之後可以加少少生粉水做成醬汁淋上飯面