【湯水】清熱消滯：山楂桔餅薏米茶

見有朋友仔教煮依個既清熱消滯又可以化痰潤喉嘅涼茶，見咁多好處就當然又跟埋一份，煲嚟俾兩位老細試下啦~

我好耐之前都曾經煲過山楂茶俾小小豬飲，不過當時佢就唔太鐘意，話個味太酸唔多肯飲。今次其實我都考慮左好耐，都係有啲怕小小豬唔飲，始終我煲湯同涼茶都係為左小小豬嘛！

不過我見今次除左山楂之外，仲有生薏米同桔餅，都係啲清熱同化痰潤喉嘅材料，所以就放膽一試，就算小小豬唔飲，我自己飲都唔錯，因為山楂可以消滯之外，仲可以燒脂去水腫，飲左仲唔即刻瘦啲啲！

材料就需要以下幾樣：

山楂四両、生薏米一両、桔餅兩個、甘草4片同片糖(一兩相等於37.5g)　

做法：

1. 所有材料浸洗一陣；桔餅就切開細細粒，咁就會易啲出味。

2. 煲內放入4公升水，待水滾後加入所有材料(片糖除外)。

3. 待再滾水後，先用大火加蓋煲約15分鐘。

4. 然後轉慢火加蓋煲多45分鐘。

5. 最後可以因應個人口味加入片糖，再用中火煲15分鐘就得。

6. 熄火後就要即刻夾起啲材料，因為如果浸得耐，個山楂味就會更加出，咁就會好酸啦。

其實煲起嚟又真係唔多錯，入口唔會太酸但又有少少桔味，我覺得雪凍左個味就好更加好飲，所以小小豬都唔多抗拒，都肯乖乖咁飲一杯啦。

自己煲當然要賞面，所以我自己都有飲，飲完喉嚨又真係幾舒服，有少少甘甘地嘅感覺呀！

溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，睇下呢個湯水啱唔啱自己呀！