【湯水】健脾滋潤：合掌瓜鮮淮山湯

行街市時見到有啲合掌瓜又幾靚，所以就買幾粒返屋企，再加埋啲鮮淮山，就煲返個健脾滋潤嘅合掌瓜鮮淮山湯～

合掌瓜我都幾鐘意用嚟煲湯，除左啖湯好清甜之外，煲過湯嘅瓜肉都係好好食。而且合掌瓜可以有祛風解熱同埋健脾開胃嘅功效。今次我加埋好有營養豐富同時又可以補脾肺腎嘅鮮淮山，咁就啱晒依排胃口唔係幾好嘅小小豬，等佢飲多幾碗湯，開下個胃口啦！

材料：

合掌瓜2個、鮮淮山1枝、鮮百合2小粒、紅蘿蔔1個、蜜棗6粒及西施骨$40

做法：

1. 西施骨洗淨汆水；掌瓜洗淨去心切半；紅蘿蔔皮切件

2. 鮮淮山去皮後會有滑潺潺嘅黏液，所以就要戴上手套處理，如果唔係就會痕到冇朋友。

我就係之前試過中招，勁痕左大半日都唔得，所以真係記得要小心呀~

3. 鮮淮山去皮切件；鮮百合切去頭尾啡黑色部分，逐塊剝開；蜜棗洗淨

4. 煲內放約4L水，隨水加入所有材料

5. 待滾起時，先用大火加蓋煲約15分鐘

6. 再轉慢火加蓋煲多1.5小時

7. 加少少鹽調味後飲得，個湯好飲就不在講，千其唔好忘記啲湯料，合掌瓜同淮山都係好有益嘅食材，食埋佢地就更加滋潤啦

合掌瓜湯對於我家嚟講真係可以話冇得輸，啖湯清清甜甜啱晒，話咁快每人三碗就清晒成煲湯，兩位老細都大讚好飲呀！