【呃仔食系列】杜絕偏食！營養日式卷蛋

每日諗呀包食乜唔算難，最難呃佢食植物，佢有本事晌撈埋一堆食物中搵到植物所在，然後吐出。

幸好……佢肯食生果。

但食生果唔夠的，於是我就久唔久將菜蔬混入主材料中等佢食咗都唔覺。

呢樣算係可以令佢食得多少少既方法咁啦～

佢衰到唔係太食蛋，一時食一時唔食，今餐食下餐又唔食。

但我諗日式甜蛋佢會喜歡啩......不過日式甜蛋有味醂，所以我一直無整過。

今日試用另一方法整，用紅蘿蔔粒混入，加入紫菜做成。

味道就只加醬油及糖再加一湯匙水，做出來無論質感或味道都同日式甜蛋好相似！

我係有辦法去對付偏食既孩子的！

做法：

蛋　　　2隻

紫菜　　1塊

醬油　　1/4茶匙

糖　　　1/2茶匙

水　　　1湯匙

蔬菜粒　隨意

做法：

1. 將以上材料撈勻  (紫菜除外)

2. 先熱鑊加油燒熱然後倒入蛋漿，只需要做成圓蛋皮就可以

3. 跟住放上紫菜卷起放晌鑊另一邊

4. 再倒入蛋漿，跟住凝固8成時再卷起

5. 如是者重複就做成大蛋卷便可以，放涼切件