話說魚子媽早前問我有冇興趣來一個小旅行，既可以去東壩萬宜地質公園參觀，玩完又可以留係酒店舒舒服服借宿一宵，咁好玩又可以見識嘅活動我緊係想去玩啦，所以就齊齊去L'hotel地質公園遊住宿計劃。
今次依個體驗真係令我眼大開界，就算係大暑之日成行，都係覺得值得呀。
作 為一個九龍東嘅人仕，由屋企至L'hotel真係可以話半個鐘唔洗。不過其實今次依個地質公園遊住宿計劃又真係好吸引，既有SynCab星群的士接送我地 來回酒店至東壩，途中仲會帶我地去西貢市中心嘅火山探知館參觀，係探知館同東壩全程都有專業導賞員隨行為我地講解，對成日想去了解多啲大自然景象但又唔識 去嘅人(即係我)，依個小旅行真係可以話係「叮」一聲，只需要舒舒服服跟住行就得，真係啱晒我依啲想去玩但又唔識玩嘅人呀！
自上次沖繩之旅後，小小豬極度愛上住酒店，正好滿足一下依個貪玩豬之餘，入酒店住下感覺都好RELAX啲呀。
今次小旅行我地獲安排入住升級套房，相對一般房間就更加大，客飯廳及睡房都分明，利用兩道小趟門設計，咁就開放性又得，想私隱啲又得，整間房間嘅空間感都大大提高呀。
小小一個飯廳角落用品都好齊存，仲有一個微波爐可以用添。當然有部分零食同飲品係要額外付款啦。
睡房內仲係一張KingSize床，真係一家三口瞓都仲有好多位呀。
洗手間同浴室係分開的，而日用品都好齊存，真係可以話咩都唔洗帶就可以入嚟住啦。
為配合地質公園遊的計劃，所以係房間內都會有與地質公園有關嘅標本同書籍，等大家對地質公園可以多啲認識呀。
休息過後我地就開始出發去地質公園之旅，原來住宿計劃內係有SynCab星群的士全程接送。小小豬都係第一次搭依啲大的士，佢都不知幾興奮。
我地第一個目的地就係位於西貢市中心嘅火山探知館，坦白講我都經過好幾次，不過都係第一次入去參觀。
地方唔算大，不過就介紹左香港火山嘅歷史同埋唔同種類嘅石頭，想了解多啲入面有咩睇，請留意我另一篇小介紹啦。
離開火山探知館之後，我地就繼續搭SynCab向萬宜水庫東壩出發。由西貢市中心入去都要差唔多要40分鐘，好在SynCab座位都係非常闊落，再上司機叔叔嘅技術好好，所以全程車都好舒服呀。
終於嚟到地質公園啦。
嘩...…整個環境都真係靚到我同小小豬嘩嘩聲，靚靚嘅藍天白雲，再加埋好特別嘅六角柱石，真係好壯觀，好難相信依度就係香港擁有嘅地方呀。
依個木橋可以話係地質公園新焦點，因為佢地係建成左大約兩個多月，就係想讓遊人可以係橋上清楚望到海蝕洞。
其實地質公園又點止咁少嘢睇，小小豬由初時攰攰的就越行越精神，緊係啦...…咁靚地方又點唔會令人心情舒暢，所以就等我下篇嚟個更詳細介紹啦。
整個行程我地行左差唔多兩個鐘，唔好話小朋友，我地大人都覺得攰，所以回程時的SynCab真係非常重要，直接車我地回酒店，真係一個不可多得嘅貼心服務....真心覺得正呀！
回到酒店休息一陣，我地就到酒店內餐廳享用我地嘅地質公園主題晚餐。
老公嘅朱古力Cocktail，佢嘅外型就好似橋咀洲上嘅菠蘿包巨石。見到佢又令我好想去見一下依個菠蘿包石，唔知幾時可以去到呢。
我嘅菠蘿柚子Mocktail，小小豬話嗰六支朱古力條就係今日所見嘅六角形火山岩。哈哈哈...…又俾佢估啱左，依杯又真係參考六角形火山岩呀。
同樣以菠蘿包巨石為藍本嘅超好味酥皮焗南瓜濃湯，佢個酥皮真係可以話係我食咁多次酥皮湯最正嘅一個，因為佢個酥皮超鬆軟而且又厚身，真心推介呀。
頭盤就係以黃竹角咀嘅沉積岩為題材嘅意大利風乾火腿配薯仔沙律。
我嘅主菜就係以沉積岩為參考嘅松茸菌西洋蒜焗澳洲銀雪魚柳，論搶眼度就一定係以脆餅疊成嘅層一層沉積岩，像真度又真係幾似。
老公嘅炭燒美國牛短排拼焗意式小圓茄，以果洲群島 - 海島奇為藍本，塊牛排佈置又幾似個小島。
最後甜品就係朱古力芭菲，參考橫洲嘅海蝕穴同埋管狀岩，感覺就好似有山有海又有石，單看賣相就都覺得好吸引呀。
就連小小豬都吸引到，佢又話要食少少甜品呀。
食飽飽我地就回房間，玩左成日，我地就齊齊早早休息啦！
估唔到一覺醒來，打開露台門就見到有驚喜，真係難以想飲係接近工業區嘅酒店望出去，都可以睇到一個咁靚嘅景色，仲可以望到郵輪碼頭嘅全景呀。
歎過酒店自助早餐，我地又去玩了，酒店內設有開放式Gym Room，不過小小豬未夠年紀去玩，所以只係參觀一下。
其實小小豬個心一早經去左游池了，游池唔算大，不過位於35之高層，就好似同藍天白雲拉近距離，整個環境舒服得唔識形容呀。
有得玩水嘅小小豬就當然係最開心，睇見佢兩父子玩得咁溫馨，我都好想落水玩埋一份，點解我次次都係咁黑仔，唔可以同小小豬嚟個水中浪漫呀。
由於地質公園遊住宿計劃係可以延遲下午3時退房，見有時間我地就去三樓露天平台參觀下啦。
話咁快我地兩日一夜嘅小旅行就結束，雖然係看似簡單，不過又真係可以話舒舒服服咁令我大開眼界，真心覺得酒店前往地質公園遊覽係一個好好嘅安排，可以遠離繁囂，輕鬆體驗不一樣的香港。
其實香港真係有好多靚地方，只係平日我地少見到少留意，原來都有好多山明水秀嘅迷人一面，好值得推廣呀！
【地質公園初體驗】親子遊：如心艾朗酒店吃喝玩樂篇
https://www.facebook.com/kinseymama
