成日話口不對心係女人既天性，但偏偏聽得最多既就係話自己okay、無問題，有時甚至會表現得好大方、無乜所謂咁，但事實上呢啲好可能係女士們想向你暗示啲嘢，旨在要你主動問多佢一兩句，可能呢啲就係矜持啦。以下呢7句說話，相信你喺佢哋身上聽得最多，咁都仲唔認自己口不對心？！

1. 「俾啲真實意見我呀！」

當聽到呢句話時，千祈咪咁天真以為對方突然想聽真話呀，通常佢都會話「認真架！我真係想知你點諗呀！」，仲會幾強調你講乜佢都唔會嬲。但係，事實上絕對唔係咁，甚至根本希望你唔止講okay咁簡單，最想得到比okay更高一級既讚美，即係如果佢問你有無肥到，或者身上件衫靚唔靚嗰陣，記得講返啲佢鐘意聽既說話喇！

2. 「我無嘢喎真係！」

另一句聽得最多既肯定係呢句，女士們仲會話俾時間、空間佢冷靜吓，又叫你唔好煩佢咁，但呢啲正正就係口不對心，有時愈咁講愈表示仲有嘢，甚至係俾個signal你氹返佢。面對呢啲情況，唔好以為答咗句okay就搞掂，之後最好再追問吓佢發生咩事，總之就係俾佢feel到你緊張佢、關心佢，咁之後再帶佢食好野，去啲特別地方，好快就真係無事。

3. 「我只係同X個人瞓過咋」

問呢啲問題，就等於問起佢以前啲ex咁，但你預咗佢會報細數，咁係因為驚你覺得佢好隨便，連帶影響埋你對佢既印象，好似話會驚同你拍得唔耐咁。至於幾時先會講真話？起碼都要一齊咗一段時間，等佢對你有足夠信心，唔會被嫌棄太濫或者隨便時，先會同你講真正既數目。

4. 「你好勁呀，我頭先好投入」

講到男女間既床事，男士們當然好在意佢哋既表現，一般嚟講評語都係好正面，甚至會讚得你稍為誇張啲；但就唔好信到十足十，話哂女士們咁做只為咗唔想傷你自尊心，先唔想講得咁直接，免得好似係度批評你咁。

5. 「我最鐘意做運動！」

唔係運動型既女士們，有時都會陪男朋友捱夜睇波又或者去現場支持男朋友踢波，但咁唔代表佢哋同你一樣好熟嗰隊球隊、球員既所有野，更加唔等於佢哋鐘意做運動，所以唔好咁天真邀請佢哋同你一齊去跑步或者打波（運動型女士們除外）。

6. 「同你啲friend出去盡情玩啦」

自從脫離咗單身行列後，時間好多時都會去哂自己女朋友度，私人生活，或者以前成班friend出去玩既日子已經不復再，而每當你話有呢啲聯誼時，佢通常都會叫你玩得開心啲咁；但心底裏佢哋始終寜願你同佢出街好過。咁係因為佢哋最怕你出去玩到無影，所以就算你真係出去同班friend玩，都唔好唔記得定時定候揾佢。

7. 「我從來無呃過任何人」

呢句說話太伏喇掛？！就算善意謊言都算係呃過人，就好似佢對你講呢句說話咁，佢之所以唔同你講真話，其實好多時都係怕自己形象會受損，尤其係同你初相識嗰陣，唔想令你對佢有誤會，覺得對住你會無句真。