尼祿金殿 Domus Aurea以及尼祿巨像Colossus of Nero (公元64-68年)

羅馬大火
公元64年,人口稠密而繁盛的羅馬城——羅馬帝國的心臟,發生左一場史上最嚴重的火災,受災人數數以十萬計,響熊熊烈火將天空照成一片血紅的六日六夜入面,城市秩序崩潰、到處都係搶掠,生還者紛紛逃出城外。有人話,呢場係一場尼祿派人所放既火,目的為左滿足佢近乎變態的演戲慾所設立既舞臺,而尼祿就響皇宮既屋頂望住大火唱歌彈琴。真也好,假也好,火災過後,世上最偉大既城市羅馬幾近被夷為平地。幾百年既基業付諸一炬,即使係羅馬傳統上既權力機關元老院(senate),都認為羅馬已經game over,紛紛提議遷都南部城市拿坡里(Neapolis,今日的意大利Naples,或譯那不勒斯)。但係尼祿另有計劃,響舊城既廢墟之上,佢既願望係按照佢自己既意願建造一座全新既羅馬城,要羅馬就好似火鳳凰一樣浴火重生。響佢宏大既重建藍圖當中,新的羅馬城將以一座極盡奢華既皇宮作為中心。呢座皇宮,就係尼祿既金殿(Latin: Domus Aurea)。


18世紀想像復完圖,建築風格並不屬於古羅馬風格,真實的Domus Aurea不可能係咁樣

廢墟上的新都
火災後,尼祿希望盡快完成新羅馬既建設,但將成座羅馬城砍掉重煉既龐大經費超出左帝國稅收既負荷。於是尼祿都通過橫徵暴斂既方法,獲得佢所需要既資金。佢更加用左一個方法竊取全國人民既財富:量化寬鬆。佢偷偷降低羅馬銀幣純度,以求用同樣數量既白銀製造更多既銀幣;用現代既講法,即係印銀紙。尼祿偷偷將銀幣既白銀由3.9克減到3.4克,如果以羅馬帝國一年平均生產200噸白銀計算(假設全部白銀將用作鑄造貨幣),每年可以鑄既5,128萬第納爾銀幣即時變做5,882萬個銀幣,等同無中生有每年變多左754萬個銀幣。羅馬帝國屬於高度貨幣化既經濟體系,以物易物近乎絕跡,而銀幣既幣值亦都係以面積而非重量黎衡量,即係尼祿既量寬人人冇得避。通過稀釋全國人民財富既手段,尼祿終於拎到足夠資金實現佢既「宏圖大計」!

暴君之殿
火災後,尼祿既新皇宮:金殿即時開建,金殿位於羅馬市中心既帕勒坦山(Palatine Hill)上,面積達到、甚至超過1平方公里。設計金殿既御用建築師分別係當時首屈一指既塞拿(Celer)同塞魯維(Severus)。金殿採用混凝土結構,內外牆身貼上打磨光滑既白色雲石,採光亦都經過精心設計。金殿內有超過300間大小房間同客廳,內裡設備極盡奢華。而室外就有碩大既花園、人工湖泊、停泊響人工湖上的私人遊船、皇家浴場甚至假山。皇宮中享有專用特供食水,由超過80公里長既水道橋供應。尼祿既願景係希望將自己的皇家園林佈置成帝國境內唔同既自然風景,將所有野都搬到羅馬。


尼祿金殿所在位置及佈局

尼祿金殿已進行考古發掘的部分(草綠色)

已進行考古發掘並開放予遊人參觀的部分平面圖,這僅代表原本建築的極小一部分

現時位於地底的尼祿金殿

現時位於地底的尼祿金殿博物館

牆身裝飾圖畫

馬賽克
據歷史記錄,尼祿既金殿內甚至有精妙的機關,會噴出香水同灑下玫瑰花瓣迎接客人。鐘情希臘藝術既尼祿甚至有座水力驅動既風琴(water organ)自動為來賓奏樂,水風琴最早係由公元前3世紀希臘發明家克特西比烏斯(Ctesibius)所發明,尼祿本人荒廢國政,多餘時間經常樂此不彼地研究改善水風琴既音色。而皇宮內亦都充滿彩色藝術品、馬賽克同精美既牆身壁畫。響尼祿金殿,我地見到馬賽克藝術響歷史上一個重要創新。自古以來,古典世界既馬賽克砌畫都係用黎裝飾地板,然而尼祿將馬賽克鑲嵌畫鋪響天花板同牆身,係開創左先河,亦都對後世既穹頂鑲嵌畫影響深遠。



開創左先河既天花裝飾鑲嵌畫(局部)

其中一張地板馬賽克

八角大廳穹頂

八角大廳3D CG復完圖

八角大廳剖面圖

旋轉宴會廳的傳奇
除左以上呢d之外,蘇埃托尼烏斯(Seutonius)《十二帝皇傳》(或十二凱撒傳)中所載,尼祿金殿裡面最有趣既係一個圓形既宴會廳(rotating banquet hall),蘇埃托尼烏斯形容,呢個宴會廳會好似天上的日月星辰一樣晝夜旋轉,永不停歇。而圓形天花板以黃金、象牙等裝飾,模彷日月星辰既運轉。一直以來,歷史學家不知記載真偽,或者係咪有誇張成份,畢竟要相信響差唔多2,000年前既古代竟然有旋轉餐廳,確實令人覺得不可置信。但2009年,響一次偶然既考古發掘當中,考古學家響金殿遺址發現左一個巨大既圓形石室。石室直徑15米以上,面積超過1,900平方呎,由約4米粗既石柱從下方支撐。考古學家亦發現地基從圓心放射而出的橫樑,以及安置其中既石製球體。由於已經有卡利古拉內米湖遊船既先例,考古學家相信石製的球體係承托旋轉宴會廳既軸承。旋轉宴會廳既原理一直成謎,直到2009年既考古發現先稍有眉目。考古學家相信宴會廳同天花板由水力配合齒輪傳動系統驅動,可以自動晝夜不停轉動,配合天體既運動,堪稱古代羅馬工程一絕。


考古學家2009年發現既「旋轉宴會廳」位置

考古學家2009年發現既「旋轉宴會廳」,圓形承重柱

圓形承重柱及橫樑

從地面向下望既承重柱及橫樑

「旋轉宴會廳」已進行考古發掘既部分平面圖

「旋轉宴會廳」結構圖,圓形地板下方由滾珠軸承承載,在機械驅動下日夜不停轉動

「旋轉宴會廳」3D CG復完圖,圓形地面及天花在水力和傳動機械驅動下晝夜不停自轉

尼祿巨像
返到金殿外面,話說自戀狂尼祿為自己豎立左一座接近10層樓高既青銅巨像(Colossus),巨像由希臘建築師芝諾多羅斯(Zenodorus)設計。相傳熱愛希臘文化既尼祿建造呢座巨像,係仿照古希臘七大奇跡之一:羅德島巨像(Colossus of Rhode)而建。老普林尼(Pliny the Elder)《自然史》中載,巨像高106.5羅馬尺(30.3米),蘇埃托尼烏斯《十二帝皇傳》所載,巨像高120羅馬尺(35.5米),相當於超過十層樓。


尼祿青銅巨像3D CG復完圖

羅馬金幣清楚顯示鬥獸場外化身成阿波羅巨像既的尼祿青銅巨像,另一張3D CG復完圖

金殿的下場
正所謂有錢冇命使,暴君尼祿並冇乜機會享受金殿太耐。公元64年動工,68年接近落成,同年,尼祿就已經陷入四面楚歌的境地。當一代暴君尼祿殞落後,元老院下令對尼祿進行記憶抹消既懲罰,而宏偉華麗既金殿就被繼任既皇帝填土埋沒。不過我地應該慶幸各位繼任並無下令將金殿拆毀,所以兩千年後我地仍然可以憑金殿研究古羅馬既建築技術發展。響尼祿之後,各任皇帝響金殿之上建造各式既大浴場同埋公共建築,當中最著名既羅馬鬥獸場亦都係建響金殿之上,並利用左金殿原有既供水排水系統作飲用同滿足表演需要。而尼祿巨像則被加上頭冠改建成阿波羅像,並用24隻大象拉到鬥獸場門外,而後人為鬥獸場安既名Colosseum,就係Colossus(巨像)既意思。尼祿青銅巨像吸取左羅德島巨像既教訓,設計更為完善;前者只係屹立左短短54年,而化身成阿波羅既尼祿巨像一直屹立左至少3個世紀,因為公元354年既歷史文獻仲有提及,甚至可能直到羅馬帝國覆亡後既7-8世紀仍然存在。巨像既大理石基座1986年被重新發展。


左:尼祿金殿已發現的部分(紅色)及覆蓋其上的建築物:提圖斯大浴場(青色)、圖拉真大浴場(棕色)
右:金殿建築佈局

直到15世紀末,一位年輕人唔小心跌入坑內發現大量壁畫,尼祿金殿先再次重見天日。而尼祿金殿既藝術同風格,包括拱廊屋頂上漆上精美圖畫既設計,亦都被當時正處於文藝復興盛期既歐洲宮庭廣泛複製。直到今日,尼祿既金殿仍有大部分尚未出土,已發掘部分已經成為羅馬城既著名旅遊景點,對於對羅馬建築同藝術有興趣既遊人,不妨購票入場一睹金殿既風采(票價6歐元)。

作者:Zannanza(本文章由聚言時報授權提供)



 https://www.facebook.com/GaldenPolymer/timeline