超級工程：羅馬是怎樣建成的IV暴君的鐵腕(3) 之卡利古拉巨艦（Zannanza）

內米湖巨船 Nemi Ships、以及卡利古拉巨艦 Caligula’s giant ship/下 (公元37-41年)

月亮女神戴安娜神廟復完圖

承上文，除左船殼本身既大小出人意表之外，最令歷史學家感興趣既係巨船上使用既尖端技術。

雙活塞水泵(double-piston suction pump)、冷暖供水系統以及抽除積水泵
為確保船上有充足的冷暖淡水供應，作為飲用、供應噴水池及供應浴場之用，兩艘船上都有完整的兩套獨立供水系統。供水系統的骨幹係船體內置既鉛管網絡，當中熱水供應浴場、冷水供應噴泉、水池及飲用水。船上供水系統連接至湖岸上既配水設備，而岸上既雙活塞水泵(double-piston pump)確保淡水源源不絕地由岸上泵到船上，同類技術則要到中世紀晚期才被重新引入西歐。後來，考古學家亦響羅馬時代民用商船上發現過鉛水管及水缸，考古學者相信係用黎運送鮮魚既貨船，顯示同類技術響實際工商同貿易上既應用。另外，考古學家發現的配水鉛管上打上「Gaius Caesar Augustus Germanicus所有財產」的標記，進一步確認左船主身份係卡利古拉。為防止船底積水，船上亦配備手動抽水泵，考古學家發現驅動抽水泵既曲柄，係目前全球發現過最早的曲柄(crankshaft)。

古羅馬青銅製雙活塞式水泵(double-piston pump, 古代原物)，配備最早的逆止閥(non-returning valve)

內米巨湖船上的鉛管原品

另一艘地中海羅馬沉船上的鉛管和鉛製蒙皮

最早的曲柄(crankshaft)

世界最早既滾珠軸承(ball bearing)
響卡利古拉既兩艘船上，學者分別發現木製既、用黎展示藝術品用既旋轉舞臺，舞臺固定響一枝位於圓心既旋轉軸。令人大吃一驚既係，舞臺底部既滑動構件不同於之前發現既透鏡形軸承，今次佢使用左青銅製推力滾珠軸承，在此之前歷史學家普遍相信推力滾珠軸承係由文藝復興巨匠達文西(公元1452-1519年)發明。內米湖船既旋轉舞臺軸承，一下子就將同類技術既發明日期推前近1500年。

達文西(Leonardo da Vinci)設計的滾珠軸承(ball bearing)及復完品，在內米湖船出土前，歷史學家不知道在達文西前的羅馬時代已經有同類軸承

Admiral式船錨(Admiral type anchor)
學者既驚喜陸續有來，佢地發現，船上配備既錨竟然係19世紀中葉先發明既Admiral式船錨！內米船錨既錨桿用鉛製，錨身大部分用鐵製成，連接部分用木製造。呢個重大發現除左將Admiral式船錨既發明推前近兩千年，仲解開左地中海海底大量棄置鉛棒之謎。呢d大量出現響地中海海底既鉛棒，實際上就係古典時代大批商船留下既船錨部件。響20世紀後半，考古學家更分別響龐貝城附近同英國威爾斯西北部發現同類既羅馬時代Admiral式船錨，確定左Admiral式船錨確實響羅馬時代已經普遍使用，內米湖船並非特例。

冶金發現
除此之外，考古學家響船上使用既金屬部件發現，羅馬人對於冶金、不同合金材料特性有先進既認識。除左最基本既鐵、銅、鉛之外，羅馬人因應部件唔同需要不同的力學性能(延展性、硬度)，使用不同配方的青銅、黃銅、鋼鐵，以達至最佳效果。內米湖船對歷史學者提供既資料，可以話超出左造船技術既範疇。

響遠離羅馬既酷熱同置身政治中心既陰謀外，內米湖成為左暴君卡利古拉私人既遊樂場所。卡利古拉響湖巨船上既豪華宮殿被美女美酒圍繞，夜夜笙歌，飲宴達旦，不理國事，過住驕奢淫逸既生活。有人話，富豪船上派對其實都係古羅馬人發明，卡利古拉響佢私人遊船上既生活，無疑同當代既所謂淫亂船上派對一脈相通。雖然更早既希臘化時代，埃及既托勒密王朝(Ptolemy Dynasty of Egypt)同西西里島既敘拉古王朝(Syracusia of Syracuse)確實有文獻記錄建造過公元前既豪華郵輪，但兩者僅有文字記錄，並沒有考古證據證明曾經存在。有確切考古證據確定其存在既古典時代巨艦，最早就面數卡利古拉既內米湖水上行宮，呢個記錄響歷史研究上暫時仲未有例子能打破記錄。

比內米湖船更大的巨艦
除左內米湖船之外，其實卡利古拉唔止起得呢兩艘巨船。可能大家仲記得筆者提及過，響卡利古拉繼任克勞狄建造佢既巨型人工港口時，曾經用過一艘卡利古拉所建既巨船，從中灌入混凝土，作為人工島燈塔既地基。呢艘巨艦目前靜靜停泊響接近羅馬達文西國際機場(Fiumicino Airport)附近既地底，遺址尚存，仍待發掘。最後一艘既建造技術甚至遠超過內米湖船既水平。最後一艘卡利古拉巨艦同響湖中作休憇用地既內米湖船不同，呢艘巨艦有能力響大海上航行，來回意大利同埃及，船體結構必須遠比無需承受海浪壓力既內米湖船堅固。

根據地質勘探，呢艘船長度最保守估計都超過100米，闊度至少超過20米，內部有至少六層甲板。而衛星圖片顯示，船身長度有可能達到驚人既140米，闊40米。卡利古拉巨艦載重量估計達到7,500噸以上既級別，達到哥倫布座艦既50倍，船員達700-800人，係屬於木結構船艦機械性能所限制既極限。為達到呢個極限既長度同排水量，卡利古拉巨艦必不可能係純木結構，而係需要使用左大量金屬加固結構。如果呢艘卡利古拉巨艦出土，將極有可能刷新古代船艦大小既考古記錄，成為歷史上最巨大既古代船舶，進一步改寫教科書對羅馬造船技術既評價。

卡利古拉巨艦遺址衛星圖片

卡利古拉既窮奢極侈、凶殘、淫亂，無疑為羅馬歷史上令後世人恐懼同恨惡的一頁，然而卡利古拉亦都為後世留下極其重要既考古記錄。佢挑戰極限所建造既巨艦，每艘都為我地二千年後既現代人提供極其寶貴既資料，亦都比我地能夠重新認識羅馬文明響造船、航海工程同科技史當中既成就。二十個世紀以前羅馬人已經發明既機械原理，時至今日仍然在我地身邊隨處可見。

今日的內米湖博物館(Lake Nemi Museum)

作者：Zannanza（本文章由聚言時報授權提供）