人人既口味唔同，有啲人無肉不歡，無論紅肉白肉都一律照單全收，另外亦有人只鐘情素食。一直以嚟有個講法，指食素唔單止可以幫助減肥，仲比食肉健康添。近日，美國有研究人員就住呢個話題做咗項研究，結果發現食素既好處，原來仲可以令我哋多大約四年命。
美國亞利桑那州Mayo Clinic既醫生做咗一個統計，發現平日習慣食紅肉，或者一啲加工肉類既人，死亡率一般都會較高，而如果持續食齋17年既人，一般都有望延長3.6年壽命。以英國為例，每個英國人平均一日食70克肉，當中男性每日食88克，女性就食52克，而更誇張既係，有指每3個人入面就有1個每日食多過100克肉。
今次研究訪問咗超過150萬人，研究人員再對相關既6個研究進行分析，指醫生應該建議病人盡量少啲食肉，或者一啲動物內臟，反而食多啲蔬菜。其中New York Institute of Technology College 既Brookshield Laurent教授更表示，一啲想瘦既人，寧願食肉之後再減肥，都唔願意改變飲食習慣戒食肉，結果對身體造成傷害。另外，有集中研究長期食肉類既潛在問題既科學家就話，成日食肉有機會誘發唔少問題，其中一樣係令患上心血管疾病既機會提升，好似調查入面就有500,000人平日好少食肉，呢個習慣就令佢哋患上心血管疾病既機會低出25-50%。
