露絲咒

創業

2016-05-07 |

2145

雙魚座男人的 DNA 是浪漫的：Steve Jobs 的攝人魅力，Bernard Arnault （LVMH 老闆）的唯美主義，或多或少可跟他們的星座扯上關係。但跟雙魚座的男人就是欠缺了一點緣分，所以無法親身感受他們那行走幻想與現實之間的獨有氣場。

最近，終於認識了一位雙魚男。名不虛傳，浪漫到嘔電。

寫過一篇文章，主角叫 Samuel Chan。自此之後，這位 Samuel 對我窮追不捨：「我認識你嗎」、「可否見個面」、「真的很感激你」，諸如此類的留言，每隔兩三天就一個。見他如此有恆心，終於給了他回覆：「你我不認識，但從別人口中聽過你的故事，有趣得來帶點勵志，於是發揮一下，謝謝你的靈感。」

唔答佢由自可，答完之後，佢成個著晒。「你竟然 reply 我」、「you made my day」、「求你可以見我一面嗎」，以前兩三天一個留言，現在變成一天兩三個。

開始懷疑佢係唔係基。

這位年輕人交遊認真廣博，竟然搭上搭上搭，透過我身邊的好朋友問我，會否跟他見個面。呢個朋友問得我，當然知道我會畀面。就這樣，我主動聯絡 Samuel：「You win，下星期三有空？」中間的細節不談了，只想說，吃完那頓飯，我交了一個好朋友，原來雙魚男真的蠻有趣的：敬重他的野心，欣賞他的創造力，佩服他的愛情理論，and the most intriguing of all，愛情理論。

因為這方面，我和他有 99% 相似。

「Marcus，你有冇試過遇過一啲人，真係見過一面咁多，嘢都講唔到兩句，已經係 more than enough to drive you crazy？」我喝一口清酒，想不到這個年輕人跟我一樣怪誕。

有遇過呢啲人，and in fact，唔係呢啲，係呢個，只有一個，我說。

「Yes。」他也乾了一杯。「得一個。」

Samuel 的一個，叫 Lucy Lam。

「嗰陣時我同佢都喺英國讀書，我喺學校嘅 sports hall 第一次見到佢。」Warwick 與 Nottingham 之間的比賽，他們是觀眾。「佢對我笑咗一吓，my heart stopped beating right there。」雖然有啲誇，但我理解。「佢啲氣質好澎湃。」Samuel 這樣形容她。由八歲開始過英國讀書的 Samuel，中文實在麻麻，我第一次聽人用「澎湃」形容氣質。

Samuel 對 Lucy 呢啲，唔係一見鍾情咁簡單，係一種超越 feel 嘅地步，講得魔幻少少，係一種詛咒。

雖然聽落魔幻，但其實是很多科學因素加起來的現像，包括你那刻身在的環境氣氛，驅使你的荷爾蒙分泌到某個級別，加上對方衣著的顏色，整個場景的溫度，甚至你當天吃過的東西所產生的化學作用，all things combined，in that split second，you took a fleeting glance at her，and she smiled right back at you，boom，詛咒 is formed，and stays there for good。

為什麼是詛咒而不是感覺？

感覺是一時的，詛咒是一世的。

七年前，地點是英國，兩個身份都是學生；七年後，地點是香港，一個是搞升學生意的老闆，一個是律師。

二千五百天的光景，寫出來寫不完，唱出來，就是「遺憾才會令你珍惜得徹底」。

儲了七年的勇氣，他第一次約會她。「好得意，見到普通女仔，可以笑得好自信，講嘢要幾 chok 有幾 chok。」相反，當見到詛咒，會急性口吃，淨係識傻笑。「Exactly，所以嗰晚，I don’t think I am any different from 一個烚熟狗頭。」自我評分極底，但無損創業家的大無畏氣魄。「我可唔可以同你傾多陣偈？」Samuel 在 Sumac 跟她喝了一杯後，問了這樣一個白癡問題。女神來個菩薩憐憫蒼生般的嫣然一笑，點點頭；就這樣，他們上了山頂。「唔係飛蛾山，係太平山，上到好高好高。」高到四望無人，但血仍未冷，車仍未震。

「當你真係遇到人生裏面個 curse，你唔會掂佢；唔係唔敢，唔係唔想，係直情諗都唔會諗。」

為她，他買過一份大而無當的禮物。

為她，他行過老土的外母政策。

為她，他願意兩日來回英國，只為跟她吃一頓飯。

結局是？

「佢冇揀我。」他黯然地嘆口氣，銷魂地再乾一杯。

輸咗畀邊個？

「There is no winning or losing in this kind of thing，is there？」

怎麼現在是他反過來教我？他忘記了他是粉絲，我才是偶像。

小粉絲，贏輸只是一個比喻，況且你才二十八，來日方長。

以你為榮。

年輕的時候，要做正事，為的是給自己將來好一點的生活；年輕的時候，也要做點傻事，為的是給自己將來美一點的回憶。