無論返工定返學，要有好表現，前一晚既充足睡眠當然好重要。但係，偏偏有唔少人晚晚都受瞓覺問題困擾，有人難以入睡，有人會瞓吓醒吓，搞到第日無哂精神同動力；呢個現象原來仲係女士們比男士們嚴重添！點解會咁？又有咩方法可以解決？
英國兩間機構Sleep Apnoea Trust Association（SATA）及YouGov，早喺今年1月時做咗一項調查，當中有接近一半既英國女士表示唔夠瞓，即使瞓得著但起身嗰刻都無差足電既感覺。調查訪問咗4100個英國成年人，發現原來女士比起男士，每晚覺得難以入睡，半夜扎醒之後好難瞓得返；就係因為咁，女士們更容易受呢個問題困擾，搞到個樣勁殘，連見人都無哂自信。
講到睡眠影響工作能力，英國University of Surrey既Sleep Research Centre最新研究就話，當女士們既24小時生理時鐘壞咗，佢哋返工時處理日常職務時，就會比男士們遜色。研究仲詳細提到，如果女士們每晚入睡既時間表一轉，除咗特別易攰，仲會令工作效能降低，甚至連認知力、記憶力同準確性都表現得差啲。相反，男士們喺呢類測試度就有好啲既表現，所以都特別適合返一啲輪班制既工作。
以後瞓之前記住以下呢5樣野，相信會幫你瞓得好啲！
1) 瞓覺都要有目標！
做每樣野之前set定個目標，一定會事半功倍，瞓覺都唔例外！每日我哋都需要足夠既睡眠時間，雖然一般嚟講都係話瞓6至9個鐘最好，最重要都係調節出最令自己舒服既鐘數。
2) 瞓前忍忍口，唔好食野喇
瞓前總喺想大魚大肉？咁就要戒喇！事關如果瞓前3個鐘食大大份野，你既消化系統就要花更多時間去工作，直接影響你既睡眠。如果習慣咗瞓前硬係要食啲野？最好就用一啲小食例如香蕉、果仁等等。
3) 飲既野都要特別注意
咖啡因、酒精類飲品會阻礙你入睡，直接影響你既睡眠質素。人體內既新陳代謝會隨住我哋年紀而逐漸減慢，所以即使晏就飲咖啡，入面既咖啡因分分鐘令我哋成個人到咗夜晚10點都係咁精神。至於飲完酒，可能會令你好快入睡，但就會影響你既睡眠質素。
4) 放鬆成個人
有時愈緊張反而愈容易有反效果，所以即使你有個概念要自己早啲瞓都好啦，你都要避免喺瞓覺既時候咁緊張，甚至逼到自己好緊張。建議你為自己製定個有助放鬆自己既一套方法，例如飲涼茶、沖個熱水涼同做一些簡單既伸展活動，而且要遠離電子產品、恐怖電影咁。最後就係營造一個適合瞓覺既環境同氣氛，包括床同枕頭要舒服，房間光線唔好太光等等。
5) 真係瞓唔到？要睇醫生喇！
喺英國Loughborough University既Sleep Research Centre，研究人員Professor Jim Horne就表示，調查雖然指出女士們受瞓覺問題困擾得多，但佢哋一般因為怕尷尬而唔肯同醫生講自己遇到呢個問題，亦正因為咁，有好多影響睡眠既潛在因素未被發掘出嚟。所以，如果發現自己被失眠問題困擾，千祈唔好輕視佢，一定要即刻去睇醫生，尋求方法。
