買包裝食品時，上面一般都會有標籤寫明成份，有啲仲會寫埋卡路里幾多。英國 Royal Society of Public Health（RSPH）既Shirley Cramer就話，將食物既成份、卡路里寫哂喺包裝，有助消費者喺買之前考慮清楚，甚至有機會改變佢哋既飲食習慣。雖然知道唔同食物有幾多卡路里，始終要知埋花幾耐先可以消耗食物，咁先最實際。下面8項食物，我哋究竟要花幾耐先可以消耗哂佢哋？
1. 330毫升罐裝飲品
我哋平日最鐘意飲既一啲罐裝飲品，糖份高之餘，咪睇佢細細罐，原來已經有138卡路里。只要飲一罐，就要行26分鐘先消耗得哂，跑步的話要用13分鐘。
2. 朱古力塊
成日話食得多朱古力會肥，市面上一啲標準既朱古力塊，就有229卡路里；如果你一次過食哂成舊的話，你就要行42分鐘先消耗哂，跑步的話時間就少約一半，22分鐘就得喇。
3. 雞肉 x 煙肉三文治
三文治係唔少人既早餐之選，但講到健唔健康完全視乎入面既餡料，就好似呢款雞肉煙肉三文治，就有445卡路里；就算跑步都要花上42分鐘，如果行路就要1小時22分鐘先消耗得哂。
4. 中杯Mocha
成日都有傳言話飲咖啡唔會致肥，但因為咖啡入面加咗奶、糖，所以卡路里絕對唔低。以中杯mocha為例，就有290卡路里；要消耗的話就要行53分鐘先消耗哂，或者跑28分鐘先得。
5. 包裝薯片
薯片經過油炸，食得多除咗會肥，更代表身體吸收咗唔少卡路里。以我哋平日市面上買到既包裝薯片為例，就有171卡路里，要行成半個鐘先消耗得哂，跑步的話就至少要跑15分鐘。
6. 花生
睇波、睇戲時，一包花生加杯啤酒，相信係唔少人既指定動作，貪花生睇落唔油又唔膩，但千祈唔好睇少佢既卡路里。如果你食一包50克既花生，原來都要行55分鐘，或者跑接近30分鐘先消耗得哂。
7. 穀物類
好多人認為穀物類早餐夠健康，但唔代表佢卡路里低，以一碗穀物類早餐為例，就有172卡路里，要行31分鐘先，或者跑16分鐘先可以消耗哂。
8. 藍莓鬆餅
鬆餅類食物最好係下午茶時段食，貪佢細細件，但卡路里就足足有265；所以，食完一件藍莓鬆餅之後，記得行返48分鐘，或者跑25分鐘先。
