瞓教係每晚必做既事，但要晚晚都瞓得好就並非必然，就算每日放工返到屋企好攰，都依然有人早早瞓喺床上，偏偏個腦好似唔肯停，幾個鐘都仲係眼光光。有無諗過你之所以瞓唔著，其實係同你瞓之前既習慣有關呢？美國南加州大學（the University of Southern California）既Dr Eric Kezirian就列出一張清單，指以下呢幾樣野係瞓前千萬唔可以做。

1. 唔好做運動

城市人每日都忙過不停，如果真係要做到日日運動既目標，做運動呢個動作只可以推到夜晚瞓前先做到，但根據美國紐約一位睡眠專家Dr Janet Kennedy所講，最好避免喺夜間做一啲帶氧運動，例如跑步，搬重物（包括做gym舉重），因為身體需要時間去降溫，以及令心跳、呼吸恢復正常，否則就難以順利入睡。她又建議，正式瞓教之前幾個鐘，最好做啲較輕鬆既活動，好似瑜珈咁。

2. 唔好食大餐

有無計過自己食晚飯既時間，同上床瞓教既時間隔幾耐？喺呢個年代，好多人都因為晏放工，搞到遲食飯，最常見既喺相隔一至兩個鐘；亦有人當晚餐係慶祝，於是諗住食豪啲，整到大大份咁。史丹福大學（Stanford University）一名睡眠專家Dr Maurice Ohayon就警告，瞓教前食太多會影響一個人既睡眠能力。佢表示，太夜食飯，又或者食完飯即刻瞓教，當身體躺下時，其實不利消化系統運作，如果當晚你食既仲係大餐，或者辣野的話，仲會搞到胃酸倒流。當身體消化期間，你既新陳代謝喺夜晚活動，影響你睡眠。

3. 唔好再玩WhatsApp或者覆e-mail

手機、電腦係我地接收資訊既主要工具，有時就連瞓教都機不離手，用佢嚟收發e-mail，打WhatsApp，睇facebook咁，但有無諗過，以上呢啲活動，其實都會影響你既睡眠質素呢？睡眠專家Dr Kezirian表示，要有好既睡眠要由睡房環境做起，除咗間房要夠暗，令身體「有mood」去瞓教之外，更要避免床上既電子產品，因為佢地螢光幕發出既光，正正破壞咗本來應該係黑暗既房間，干擾人體既晝夜意識，令我哋難以入睡。

4. 唔好睇啲sad爆既節目

有人鐘意瞓之前睇下電視，仲會特登揀啲又sad又沉重既戲，甚至會覺得個人喊完對眼咁攰，一定會好好瞓，咁呢種諗法就大錯特錯喇！其實瞓之前睇電視okay既，重點係要識揀啲輕鬆既節目，例如喜劇。睡眠專家Dr Kennedy指，傷心、驚嚇既電視節目唔適合我哋瞓之前睇，因為呢啲節目會令我哋成個人變得緊張，心跳加速，身體會釋放腎上腺素，成個人就會維持喺一個清醒、警覺既狀態下，變相需要更長時間沉澱落嚟，自然影響睡眠質素。

5.唔好飲酒

飲酒可能係唔少人用嚟減壓、relax既選擇，仲有人會話飲咗酒個人會更容易瞓著，但係，Dr Ohayon就警告，呢種說法絕對唔正確，酒精會影響我哋既睡眠，如果瞓之前飲酒，更會增加一個人打鼻鼾既可能性，而且令人半夜起幾次身，換句話說，就係直接影響我哋既深度睡眠。

6. 唔好飲含有咖啡因既飲品

咖啡因既作用在於提神，朝早返工之前飲咖啡、茶提神，令大腦直接進入工作模式，提高生產效率。所以，要一個準備瞓教既人，又點會揀係夜晚臨瞓之前飲含有咖啡因既飲料呢？睡眠專家Dr Kennedy表示，人體需要較長時間代謝咖啡因，所以其實喺下午四點開始，你都唔應該再飲咖啡因飲料。雖然，有啲人就算飲咗咖啡都依然瞓到，但佢一樣會損害你既睡眠質量。

7. 唔好開燈瞓

呢個習慣可能係你同我最容易忽略，就係開住燈瞓教，睡眠專家Dr Ohayon就表示，如果瞓教時開住少量光線係無問題，但如果成間房太光的話，就會干擾你睡眠，甚至你既睡眠質素，係一個重大的睡眠禁忌。