有時唔小心將食物整跌落地之後，為咗唔想嘥野，有個講法話只要食物跌落地唔過10秒都可以執返嚟食，但原來呢個「10秒守則」分分鐘累咗你！有專家就指，食物跌咗落地之後，即使只係短短10秒，都已經有細菌黏喺食物上面，一啲都唔安全！

好多人都一直相信食物跌落地之後的「10秒守則」，仲會用佢嚟判斷食物仲可以食落肚，但近日有美國既研究人員就指，呢個守則只係一個神話，單喺美國就有三分之一人因為呢個「十秒守則」，實際上一直都食緊污糟食物，其中有37%受訪者會執返跌喺廚房地板既食物，38%受訪者就會食返喺客廳跌咗落地既食物；研究人員仲話，即使食物跌咗喺自己屋企地板上面呢啲睇落乾淨既地方都好，仍然會有大腸桿菌、沙門氏菌黏附喺食物上面。換言之，無論食物跌落地一秒定十秒都好，應該即刻掉入垃圾桶。


一間名為Kärcher既清潔技術公司做過一個調查發現，49%既受訪者平日依靠掃把做清潔，而43%受訪者就只噴空氣清新劑嚟清潔屋企，但事實上兩個方法都無法殺死細菌；至於幾時先打掃間屋一次呢？59%既人就承認，會等到屋入面有明顯既污跡先做清潔，而27％既人甚至聞到間屋有怪味先做清潔，否則都唔會打掃。


索爾福德大學（University of Salford）客席教授兼衛生保建專家Dr Lisa  Ackerley就警告，大部人對家居衛生既概念完全錯誤，唔重視家居清潔同我地既關係，正正令我地有機會感染細菌；屋企呢個看似乾淨既地方，其實有好多「無聲殺手」，有好多我哋都睇唔到、聞唔到既細菌，一個單一細菌可以喺短短七小時入面增加至幾百萬個。另外，對於一啲屋企有養狗既人嚟講，調查中有40%指佢地平日俾狗隻跳上自己床，每10個人當中只有1人會係同狗隻散步之後同佢地清潔。

Dr Ackerley補充，平日帶狗隻出街散步後，狗隻通常會帶埋微生物、糞便返屋企，當中含有大腸桿菌，空腸彎曲菌和沙門氏菌。所以，小規模清潔比起大範圍清潔更重要，換言之單靠噴空氣清新劑係無用架！細菌同病毒睇唔到、聞唔到，只有喺高温下先會被殺死，例如用一啲高温蒸氣清洗機。