【湯水】虎乳靈芝雪耳百合湯：補肺益氣、氣管敏感最岩飲！

依排啲天氣真係令人周身唔舒服，加上我自己又有啲氣管敏感發作，所以就煲左個虎乳靈芝雪耳百合湯，等三口子齊齊增強抵抗力啦~

其實我之前都煲過幾次虎乳靈芝，我地三口子都覺得味道都唔錯呀！

虎乳靈芝唔屬於靈芝科，其實佢係真菌科嚟，對補肺益氣，增强肺功能都有一定療效。平日小朋友係學校很容易感染傷風感冒，平時飲可以預防傷風感冒、强壯體質同埋增強抵抗力。

虎乳靈芝都唔係好貴，我係藥材店買1舊大約係1両，都係$40，我三個人飲用就可以分三次煲啦。

買嘅時候就係一舊舊，一般店員都會係我地買左之後再幫我地切片。

小朋友容易感染傷風咳嗽，所以用虎乳靈芝加埋雪耳、南北杏同埋百合一齊煲，有補肺益氣及潤肺止咳嘅功效呀！

材料：

虎乳靈芝(我買左一両，今次落左三分一份量)、雪耳一朵、南北杏一湯匙、百合1兩及瘦肉$40

做法：

1. 雪耳浸洗去蒂切細舊、其他藥材浸10分鐘沖淨、瘦肉洗淨汆水備用

2. 煲內放約3L水，待水滾後將所有材料放入煲內，改用中火煲半小時

3. 之後轉用慢火煲約一個半小時~

4. 最後加鹽調味就飲得

之前小小豬都好鐘意飲虎乳靈芝湯，今次加埋雪耳一齊，佢就仲更加鐘意，就連煲內嘅雪耳都差唔多俾佢食晒呀！

(見佢飲得咁開心，依啲咪就係我嘅動力嚟啦...…哈哈哈)

雖然係好飲又有益，依個湯仲非常啱小朋友添。不過...…如果各位大小朋友病緊嘅時候，就唔好飲住，要等好番先可以飲啦！！！

另外再提一提大家煲過嘅雪耳一定要即日食/飲晒，如果隔夜，經過一夜嘅浸透，佢就會放出一啲有害物，到時就有益變有害啦！   

BY 小小豬的成長日誌