【湯水】養陰潤膚：猴頭菇螺片滋補湯

新年大吃大喝之後，係時候要食返清啲等腸胃回復健康。所以我就煲左既可以既滋補又清腸胃嘅猴頭菇螺片滋補湯俾兩位老細飲啦～

猴頭菇益腸和胃；螺片滋陰養肝，再加埋黨參、北芪同圓肉一齊煲，對腸胃好之餘，對滋補養陰及潤膚養顏有顯著幫助呀。

我就係三人份量，煲出嚟約有六至七碗左右，

材料需要：

瘦肉約$40；猴頭菇、螺片、黨參、北芪、圓肉，你同藥材鋪店員講大約幾多人飲，佢就會幫你執份量架喇！

做法：

1. 猴頭菇及螺片先浸至軟身(大約兩小時左右)，然後就切成小塊

2. 瘦肉洗淨汆水備用，其餘嘅藥材就浸洗一陣

3. 將2L清水燒熱，然後放入所有材料

4.水再滾後轉慢火煲一個半小時

5. 最後加少少鹽就可以飲得啦～

之前我都有煲過猴頭菇湯，不過就只限飲佢啲湯，真係冇諗過係可以食。原來佢嘅味道又真係唔錯，而且仲係好有益，食左猴頭菇之後就好似食左個清道夫，幫你掃走晒啲唔健康嘅嘢排出體外呀！

雖然都係用藥材嚟煲，不過完全冇嗰啲藥材味，入口反而係甜甜地，我家兩位老細都讚好飲呀！

哈哈哈...…佢地鐘意就好，咁我就可以多啲煲，清下體內嘅唔健康嘅嘢，又可以滋潤一下，飲多啲...…對身體都好啲呀！