【超Hea任坐】HMV嘆超Juicy「和牛漢堡」@銅鑼灣旗艦店

朋友A跟我Whatsapp拜完年寫:「銅鑼灣HMV搬咗過明珠廣場，三層都好Raw，好歐美工業Feel (我:關我咩事， 我都唔聽歌)」

朋友:「唔係呀！ 四樓係餐廳，嗰份和牛Burger正到痹。」

一聽見有得食， 嘩！ 和牛喎...…我又怎會放過機會，年初三即時拉SY及阿太去探牛牛。

去到明珠廣場，  阿太說:「以前依度咪係鳳城囉…...乜執咗嗱？」心諗:「係都唔出奇， 我哋5年先食得一次，依家幾層嘅酒樓，點做吖？」

坐電梯到4樓餐廳，甫坐下，SY大叫:「點解有個咁大個時鐘嘅？」我就即時想起阿飛正傳的電影海報。

點食物後， SY便四周巡視:「點解咁多英文書？都無我鍾意睇嘅 (我:你最鍾意睇老夫子， 依度唔會有啦...…喇！！有日文書呀)」

SY接過雜誌， 望一望:「車！ 又唔係ARASHI，又唔係幪面超人，我都唔識佢哋」我:「乜你咁麻煩架！ IronMan得唔得呀？」

SY:「我好想買呀？ 爸爸」...…敏感的爸爸， 當一聽到「買」字， 即時反應:「哎呀！有得食啦喎...…味美嘅漢堡包，同薯條嚟咗啦喎。」

和牛漢堡($148)，  因為我點了Medium程度， 所以約5成熟的外脆內嫩， 單單賣相已經贏到上天。

手執漢堡左影右影， juicy的肉汁不停滴到枱面， SY:「依啲咩嚟架？ (我:好食先會漏汁啦)， 爸爸！你影完未，我好想食啦。卞卞卞卞卞卞卞卞卞卞卞卞卞卞卞卞卞卞卞卞卞卞卞卞卞卞卞卞卞卞卞卞卞卞出卞卞卞卞卞」

本來我再想額外配黑松露、溫泉蛋、煙肉、 鵝肝...…不過要再付$10-$40不等...…還是算了罷. 

麵包底部也烤得香脆， 更塗滿牛油...…SY:「我好鍾意依度D薯條，好粗壯，平時麥當勞呢...…好瘦(我:咁好唔好食？)梗係好食啦！仲駛問。」

不過，漢堡帶微辣，個人覺得應該是增加層次，多於一辣遮三醜吧！ (可能係， 除非唔係！！) 

牧羊人羊肉醬薯蓉($168) 是SY指定要食的:「因為我鍾意薯蓉呀！」結果一樣沒有失望。

羊肉當然售價貴少少，不過暫時略嫌羊味太少，但肉醬夠香，而且內有豆豆，鍾意油不多，夠乾身的感覺，一配薯蓉吸引到不得了。

銅鑼灣食東西，雖然價錢較我平日的庶民美食有少少距離，但惹味程度偶然來Hea一Hea，新正頭，食環境，好配合放假心情...…不錯！不錯！ 

HMV最正就是人少，地方大，目測最少一萬呎以上，我和SY簡直「為所欲為」四圍走，同樣無人理。 (可能外籍人士忍耐力強都未定)

臨走前忍不住一家三口再發台瘟， SY:「我唱歌，媽媽彈琴啦...…不過點解都無咪嘅，點唱？」可能Live Band要夜晚先有，「私家咪」衛生好多啦！！

舒適:★★★★☆
食物:★★★★☆
價錢:★★☆☆☆

HMV旗艦店
地址：銅鑼灣明珠廣場2至4樓

營業時間：
2/F-3/F 時間：10am – 11pm(逢星期日至四及公眾假期); 10am – 11:45pm (星期五至六及公眾假期前夕)
4/F餐廳營業時間：10am – 12am(逢星期日至四及公眾假期); 10am – 2am (星期五至六及公眾假期前夕)


大仁生活