【食譜】臘腸潤腸煲仔飯

這兩日的氣溫破了59年記錄，氣溫維持2度 - 5度。cici 都落過街，風大到刺骨。在街市，大部分人都爭相搶購打邊爐的食物，蔬菜類因應嚴寒天氣價格亦漲了很多。

天氣凍凍地，食煲仔飯最好不過。

用Staub煮，既快捷又好味，配上自家製煲仔飯豉油，食完更會暖笠笠！

每年我都會在相熟臘味店購買臘腸、潤腸、臘肉。這次介紹我購買臘鴨胸，它比臘肉較硬，而且鴨味不太出，感覺一般。

臘腸潤腸煲仔飯 - Staub 煮理 (2人份量)

材料:

米 1杯

水 1杯 (米量杯)

臘腸1條

潤腸 1條

臘鴨胸 半條

煲仔飯豉油:

生抽 1湯匙

老抽 1茶匙

糖 1 1/2茶匙

麻油少許

水 1湯匙

做法:

1. 米洗淨，預先用1:1水分浸約半小時。

2. 臘腸、臘鴨胸、潤腸用熱水略洗，洗去表面油層後，切片。

3. 將米倒去水分，再倒入 Staub 鍋內，倒入1杯米量杯水，用中大火煮3分鐘，打開蓋用筷子攪拌片刻。

4. 見米開始收水，之後將臘腸、臘鴨胸、潤腸，蓋上蓋，煮約6分鐘。

5. 轉細火煮約10分鐘，熄火焗15分鐘。

6. 用小鑊將煲仔飯豉油煮至糖溶掉，食用時淋上飯面，即成。

**小小貼士**

- 飯用筷子攪拌，以防痴底。

- 煲仔飯豉油可用市面現成的。謹記煲仔飯豉油一定要預熱，才可倒入米飯，不致降低煲仔飯的溫度。

- 鑄鐵鍋傳熱快，所以要留心控制火力，以免燶底。