【食譜】椰汁桃膠西米露

既然咁辛苦先買到桃膠，緊係唔好浪費，煲多啲等自己潤多啲嘛。

係網上見到食個椰汁桃膠西米露嘅做法，見到好似幾簡單，加埋我又係一名椰子控，所以又嚟試下先~

其實個煮法同煮西米露都係大同小異，只係加埋桃膠一齊煮。

由於都只係打算兩公婆當宵夜食，所以材料都只係二人份量。

材料 :

桃膠　一湯匙

大粒西米　一湯匙(因為我自己鐘意有啲咬感所以用大粒，隨個人喜歡改用細細粒嗰款都OK呀)

椰漿　200ML

水　500ML

冰糖　少許(視乎個人喜愛嘅甜度)

做法：

1. 桃膠用水浸6-8小時至發大，途中記得要換幾次水，之後就除去啲黑色雜質，就完成浸桃膠過程啦

2. 要準備要煮西米了，首先起鍋煲水，待水滾時就將西米倒入鍋中，改用小火煲大約8-10分鐘(記得要邊攪拌啲西米，如果唔係就會"痴"埋一齊啦)之後就可以熄火，然後焗佢10分鐘

3. 將透明嘅西米用凍浸一陣，然後撈出瀝乾備用

兩樣主材料都準備好，就可以開始煮啦！

4. 將500ml水煲滾後，加入桃膠及西米以小火煮8分鐘

5. 然後加入200ML椰漿

6. 最後加埋冰糖

7. 煮到冰糖溶晒之後，就可以食得啦

哈哈哈...…可能我自己個人都比較鐘意食椰汁食物，所以比起上次蘋果桂圓燉桃膠（http://yes-news.com/43961/），我就覺得依個更加好味。

桃膠本身就唔算太重味，所以加埋啲椰汁一齊食，又真係幾唔錯，當然仲有彈牙嘅大粒西米，真係正呀~

大件事！依排成日都煮糖水做宵夜，真係又肥幾磅都得啦，不過係天寒地凍食碗暖暖糖水先去瞓，成個人暖笠笠又真係好瞓啲，加埋啲糖水又咁滋潤.....所以唔理咁多，食左先算啦！