桑寄生蓮子紅棗茶

大家千其唔好俾我今日煲嘅嘢嚇親，桑寄生係對孕媽媽好好，我記得生完小小豬嗰幾日，老公都煲嚟醫院俾我當水飲。

當然今次煲一定唔係依個原因，因為桑寄生都仲有好多好處，冬天喝一碗桑寄生茶，可以行氣活血同滋陰養顏。所以趁今日凍凍地，煲桑寄生蓮子紅棗茶等自己暖暖身最重要~

桑寄生其實都真係又平又有益，係藥材鋪買一大盒二十蚊都唔洗，仲要可以煲好幾次，真係勁抵。

依啲好似柴支咁嘅東東就係桑寄生嚟，桑寄生其實對我地女仕養顏亦有顯著嘅功效，只要妳每星期連續飲2-3日，面色及皮膚一定可以保持紅潤~

今次依個份量就只係煲俾我一個人飲，煲左大約有3-4杯左右，咁我就全日飲用。材料有桑寄生約半飯碗匙、蓮子兩湯匙水、紅棗六粒及水1公升~

先將紅棗切片去核，連同桑寄生及蓮子一齊洗乾淨，然後瀝乾水份備用~

鍋內放至1公升水，然後將所有材料加入放入，然後開爐火~

用中火煮滾後，就可以轉用慢火繼續煮45分鐘~

如果有需要可以落少少片糖調味，不過我就因為係當水飲，又唔想飲得太甜，所以今次就冇落。

煲好之後就盡快隔走啲渣，因為桑寄生浸得太耐就會令到茶味變苦同"鞋"口呀(我當然係因為曾經失敗過啦)~

飲得呀~

凍冰冰飲杯暖笠笠嘅茶都真係人都舒服啲，手腳都唔會彊硬。不過....幾時先凍完啦，一凍真係攪到成個人做乜都冇心機，最重要係...天寒地凍咁去洗碗洗碟又洗餸，真係凍到入心呀！