【食譜】平民版燕窩！蘋果桂圓燉桃膠

依排係FB啲煮食版都俾桃膠洗版，又平又滋補嘅嘢當然係勁想試，不過搵左好耐都買唔到，終於今日行過俾我買到啦！

第一次試整都唔打算太花巧，利用屋企嘅現有材料，整依個蘋果桂圓燉桃膠啦～

哈哈哈...…見啲網友仔真係讚得好利害，當然係好想試下。

其實「桃膠」乃桃樹嘅天然分泌物，於樹上結成琥珀色晶體，蘊含豐富植物膠原，具美顏、滋補功效，最重要是價錢較傳統花膠、燕窩便宜，絕對是平民養顏恩物，而且其功效近似燕窩，冬天用來煲糖水相當滋潤。

由於都係第一次煮，所以都唔敢煮太多，同埋係咩味道，所以今次就冇預小小豬份，只係煮兩人份量先啦！

材料：

蘋果　　一個

桃膠　　一湯匙

桂圓約　六粒

紅棗　　六粒

南北杏　半湯匙

冰糖　　少許(視乎個人喜愛嘅甜度)

做法：

1. 桃膠用水浸6-8小時至發大，途中最好換幾次水

2. 要留意桃膠都係啲天然食材，難免有啲雜質，所以要細心咁除去啲黑色雜質呀！

浸好左啲桃膠又真係比初時大好多倍，亮晶晶咁又幾靚哦～

3. 蘋果去皮、去芯、切粗粒

4. 桂圓、紅棗及南北杏就浸洗備用

5. 將蘋果、桂圓、紅棗及南北杏連用兩飯碗水放入燉盅內

6. 放入電子燉盅內先燉45分鐘

7. 其後再將冰糖及桃膠加入燉盅內，再燉30分鐘

食得啦...…記得要趁熱食呀～

第一次燉蘋果，連埋啲果肉一齊食，甜得嚟又有點酒香味(哈哈哈...…我都冇落酒，應該係個蘋果發出嚟嘅)，估唔到又幾好食。

之前睇網友講話桃膠囗感似雪蛤膏，算我一向少食貴嘢，唔知雪蛤膏係咩味。不過我就覺得有啲似啫喱，加埋啲糖水一齊食，口感同味道都唔錯呀！

桃膠其實仲有好多配搭，我買左成一大盒，今次都只係用左少少，所以...…真係可以慢慢整多啲唔同花款，等自己潤一潤先得！