挪亞方舟 x Mr. Men Little Miss童樂聖誕城

上一次入嚟挪亞方舟我地就嚟學打工，小小豬對依個活動都仍然係念念不忘，成日都話要再入嚟做消防員。

估唔到事隔四個多月，我地又有機會嚟挪亞方舟玩啦，今次我地嚟參加 Mr. Men Little Miss童樂聖誕城呀~

一聽到挪亞方舟依四個字，小小豬嘅情緒就極度高漲，不停係我耳邊講...…上次我扮消防員點點點...…上次我又做醫生點點點，總之就係我耳邊不停RECALL佢嘅開心回心憶。

今次「挪亞方舟 x Mr. Men Little Miss童樂聖誕城」同上次入嚟玩都係一樣，只要購買入場劵，即係百幾蚊就可以玩晒大部分嘅遊戲(除左《笑瞇瞇廚藝學堂》需另加$50參加)。

基本上今日小小豬嘅活動都好豐富，我地約差唔多十二點入到嚟挪亞方舟就已經開始玩啦！

我地第一個活動就係《動感聖誕劍術樂》，睇個名就知道係嚟劍擊。由於小小豬之前完全係冇接觸過，所以佢初時都有帶點擔心咁去參與(好明顯又係佢啲自信心影響)~

不過當WARM-UP左之後，從佢嘅笑容就知佢係有幾開心啦~

活動係由專業劍擊教練親自親授，當中包括前香港排名第一 (2003至2007年度男子佩劍) 兼前香港亞運代表隊成員阮浩然教練教授小朋友真正劍擊的技術，絕對唔係柴娃娃，好認真呀！

教練會透過幾個小遊戲講解劍擊種類、比賽規則及比賽預備步法及小朋友嘅反應同姿勢~

仲會俾小朋友學習刺劍添~

小小豬都有姿勢又有實際，都叫做做到要求啦~

真係唔覺唔覺又上完一堂，時間真係過得太快，小小豬都未夠喉添。教練教埋最後一個收劍禮就要落堂啦~

最後當然要嚟返張型仔相啦~

依個攪笑嘅小小豬好似已經愛上左劍擊咁，離開課室之後問我幾時可以再嚟「Enguard」，真係俾佢笑死。不過咁都好，證明佢接受依個新嘗試，享受剛才的課堂，話唔埋佢之後大個真係可以做個劍擊手呢...…嘩哈哈！

玩左一個咁刺激活動，係時候要去醫下肚，去餐廳食午餐。

食物都係其次，主要係可以對住咁靚嘅VIEW嚟食嘢，真係食都食得特別醒神呀~

接住我地就去參加《Mr. Men Little Miss馳騁冬日城》，小朋友們換上聖誕衫，變做聖誕老人小助手，摸擬運送小禮物。

不過，佢未開始揸車車之前，導師都透過情景教導一啲交通安全知識及過馬路的正確態度，等小朋友們做個正確嘅行人同駕駛者~

哈哈哈...…上完堂就當然要去實戰，去幫聖誕老人運送小禮物啦~

揸住部砵砵車係馬路上，要留意交通路牌之餘，又要留心聽導師指示~

因為係中途小朋友們係需要幫泊去部車去幫聖誕老人運送小禮物嘛，所以好玩得嚟都係好好訓練小朋友嘅聽指令同反應。

好在小小豬都叫做表現唔錯，每次都好快手咁送禮物，都算佢冇掛住玩啦~

哈哈哈...…除了任務完成之外，小小豬擁有佢嘅駕駛執照啦~

其實除左小小豬剛才玩嘅砵砵車之外，仲有另一款適合6歲以上小朋友玩。

工作坊係會有分年齡及時段開放唔同嘅車仔嘅，不過...…由於小小豬不停扮可愛咁問負責姐姐，所以最都俾佢揸大車玩一轉啦~

今次活動主題係Mr. Men 和 Little Miss，所以都有一個《Mr. Men Little Miss爆笑合拍區》，可以穿上獨家嘅Mr. Bump與Little Miss Sunshine服裝，盡情影相~

之後我地就去睇《泡泡魔幻派對》，依個可以話係小小豬最期待嘅一環節，因為有得睇魔術之餘，又可以有泡泡玩，佢又點會唔興奮呀~

真係不得不讚長頸鹿哥哥、彩虹姐姐仲有大獅兄，佢地既跳舞又要表演，仲好識同我地攪氣氛，所以全場大小朋友都好興奮呀！

尤其係長頸鹿哥哥嗰個泡泡表演，真係超好睇~

哈哈哈...…相信全場最興奮嘅一定係小小豬，因為佢被邀請出去同長頸鹿哥哥一齊表演泡泡呀~

又可以同大獅兄一齊跳舞~

最後仲可以走入超巨型泡泡入面，你話佢點會唔係十倍興奮呀！

佢開心到直頭唔願返埋位，一直企係個圈圈度……哈哈哈！

離我地下個活動仲有少少時候，所以就周圍行下，主要都係帶第一次嚟DADDY去景點影相呀~

我地去《笑瞇瞇廚藝學堂》跟酒店大廚學整Mr. Men Little Miss嘅Cupcake，雖然依個活動係要另加$50參加，不過蛋糕、廚師帽及圍裙都係可以帶回家，所以都算好抵呀~

小朋友們都好專心睇大廚示範~

雖然平日都同小小豬玩開親子廚房，不過裝飾Cupcake都係第一次，所以初時都有啲啲唔知想點咁。慢慢做又好似捉到個技巧，所以之後都叫密密手印樹葉~

有整機葉就開始佈置呀~

大功告成，都叫幾靚呀~

嚟到今日最後一個遊戲，就係去幫聖誕老人手送禮物嘅《日夜反斗大冒險》。依個遊戲講求合作之餘，又可以測試小朋友嘅反應，真係幾好玩。

話明係日與晚，即係分兩PART進行幫聖誕老人收禮物同派禮物 ~

日頭部分就係等小朋友要分成兩組，係聖誕樹陣入面搵聖誕姐姐指定嘅禮物，然後慢慢層層疊咁放係禮物車上，又高又穩定就勝出啦~

係日頭就收集晒啲禮物，就到要係晚間派禮物。最攪笑聖誕老人係會人要求小朋友靜靜地派禮物，唔可以嘈醒熟睡中嘅小朋友呀~

估唔到小小豬又真係做得幾好，當聽到鼻鼾聲又識得企定定，仲問：『邊個咁大鼻鼾聲呀？』真係好好笑呀~

小小豬話依個遊戲係最好玩，你見佢同聖誕老人影相咁開心就知，全日佢最會心微笑都係呢張相啦~

其實我地今日節目都好豐富，所以有部份工作坊同埋展覽室我地都未去到，DADDY話搵機會要再入嚟玩過，或者試下BOOK依度嘅酒店，等我地嚟歎返一日(哈哈哈...…希望好快成事啦！) 

小小豬話今日啲活動佢玩得好開心，不過.....連我地係旁邊睇到覺得好好笑。好笑係因為每一工作坊嘅導師都會好專業同認真嘅同小朋友講解，又好識帶動全場氣氛，所令大人同小朋友都玩/睇得投入呀！

可以係遊戲中學習都係我一向鐘意活動，而且價錢又唔貴，所以都幾值得同大家推介，趁聖誕假期入去學做一名小聖誕老人呀！

有一點提一提大家，每小朋友入場即獲派活動通行證，入面有各遊戲嘅時間表同埋派籌時間，基本上每個遊戲前30分鐘先換籌。另外亦可預先登入挪亞方舟網站睇下，預先計劃好行程，就可以多玩幾個遊戲啦！

More information :
挪亞方舟x Mr. Men Little Miss童樂聖誕城
日期: 2015年12月5日至2016年1月3日(逢星期六、日及公眾假期)
**《動感聖誕劍術樂》1月1日暫停
時間: 上午10時至下午6時
入場費: 成人HK$168；小童及長者HK$138  (入場後免費參加，《笑瞇瞇廚藝學堂》需另加$50參加)。)

Website： http://www.noahsark.com.hk