【食譜】香菇黑木耳蒸雞

又返爸爸屋企做偽大廚，上次俾投訴話冇菜式，所以就嚟攪攪新意思，整返個好味又有益嘅香菇黑木耳蒸雞啦~

其實我都係見屋企有啲冬菇、黑木耳同埋一隻新鮮雞，所以就興起煮依個餸。

原來黑木耳係好有益，對補氣血、潤肺、同埋高血壓都好有幫助呀！

做法：

1. 首先雞洗淨，之後用半茶匙生抽、1湯匙米酒、少許鹽、胡椒粉、麻油和粟粉，醃最少30分鐘

2. 冬菇及黑木耳放入碗中用溫水浸軟

3. 之後切成小塊備用

4. 最後將所有材料混埋一齊

5. 想出味啲就放幾粒已浸軟嘅杞子

6. 隔水大火蒸15-20分鐘左右(時間長短要視乎雞嘅大細，而作出加減)

YEAH！食得啦~

其實我自己就最鐘意食蒸雞，因為既方便得嚟又可以保持雞嘅原汁原味，咁食法真係滑嘟嘟好多呀。

再加埋啲冬菇同黑木耳索哂啲汁，真係好滋味呀！