朋友在觀塘上班，通常想食日本菜都會去一間叫鳴門的日式餐廳，皆因這餐廳用料新鮮，出品用心，味道出眾。此餐廳從門面已是很日式風格裝修，大大個木招牌，搶眼的日式紅燈籠，木枱木櫈同掛畫裝飾，都充滿著日本風情。
今次我們一行四人，先來一客餐前菜果醋漬宮崎小蕃茄，味道酸酸地帶小小醋香，清新開胃。
跟住來了海膽和油甘魚刺身。海膽十分新鮮，大大塊濃郁甘香。油甘魚刺身充滿光澤，一望而知鮮美可口，厚切啖啖肉，十分滿足。
除了刺身，還單叫了幾件壽司，赤貝、帆立貝、鱆紅、劍魚腩、灸燒三文魚腩、青瓜小卷同海膽甜蝦三文魚卷，魚生是毫無疑問的新鮮，飯團用壽司醋調味得剛好，大小適中，飯粒有咬口，水準依然。
牛油果軟殼蟹卷
卜卜脆的蟹子，軟軟的牛油果加上沙律醬，配上軟殼蟹的香口，一直以來都是最佳拍檔，每次嚟到必叫一客。
輪到熱食，首先嚟個燒雞翼同燒羊架。雞翼已剖開兩邊每塊肉只帶一條骨，方便進食，外皮亦燒得香脆，唯可能切開了流失了肉汁，令肉質較乾身。
羊架以香草黑椒及醬汁燒得微焦，配上英式芥末，肉味濃夠惹味。
之後是墨魚海膽黃金燒，見到賣相已經流哂口水，味道甜甜地帶淡淡海膽香，配上Q彈墨魚，甘香有嚼頭，但較為滯口，一件起兩件止。
再來是什錦天婦羅，炸蝦夠大隻，天婦羅脆漿上得薄薄的，炸得香脆鬆化無油膱味，配上蘿蔔薑蓉及天婦羅汁，完全帶出鮮味及減少了油膩感。
最後是泡菜牛肉鍋，帶著點點韓風，泡菜般微酸辣的湯底，讓人胃口一開，減輕了之前的飽脹感，加上嫩滑的肥牛及配料，口感豐富，香辣開胃兼而有之。
整餐保持著一貫的高水準，每人消費約$250，物有所值，有美味食物外還可以為支持小店經營出一分力，特別有意義。
後記：最近同老闆聯絡過，不幸的消息傳來，得知這小店已於十月份因成本上漲及租金壓力下被迫暫時休業。如此用心，真材實料的小店，最終都敵不過加租洪流而難逃被淘汰的厄運，實屬非常可惜！所以本人宗旨一向支持小店，略盡一點綿力，為他們爭取多一點生存空間，希望老闆在不久將來會再戰江湖啦！！
https://www.facebook.com/myplayground2015
