【食譜】秋燥潤肺之選．滋潤雙梨水

早幾日睇FACEBOOK見有朋友仔煲左依款涼茶，見啲回應都話好好飲，加上個煲法又幾簡單，所以我都試下煲滋潤雙梨水喇～

雪梨就最啱依個時候飲，因為夠潤之餘對肺保健都好好。

之前都成日用雪梨嚟煲，今次都係第一次用兩款梨嚟煲，唔知係咩味道呢（左邊尖尖地就係鴨梨，肥肥地嗰個就係貢梨）

材料：

貢梨4個、

鴨梨4個、

蜜棗6粒、

無花果6粒、

南北杏少許

做法：

1. 所有梨洗淨後去蒂去核，但不用去皮，之後就切開細塊。其他材料都要洗淨，另無花果要剪開一半。

2. 煲內放約2L水，隨水將其他材料放入煲內。

3. 待大火煲滾後，轉中慢火煲1個半鐘

4. 然後用湯勺按壓梨和蜜棗，讓梨汁盡出

5. 再煲多半小時

飲得啦！

未飲就已經聞到好濃梨香味，入口就甜甜地，飲完喉嚨都好似幾潤，可以話講嘢都大聲啲呀～

雪凍嚟飲都係唔錯，不過就存放雪櫃3日內就要飲完！

功效：

滋潤雙梨水有助養陰清熱，潤肺生津，也幫助排尿酸。對聲音沙啞及有痰氣喘人士特別有效。

雖然係好飲，不過兩款梨加埋一齊就比較涼，所以脾胃極虛寒，或產後血虛均不宜飲用，也不能與鵝或蟹同食，大家要留意啦！