【西環／灣仔】懷舊冰室大翻身，讓你我回到過去

冰室，可以説是茶餐廳的前身，是六七十年代人們閒時飲西茶傾偈，較西餐廳便宜的一個選擇，以前是沒有那麽多連鎖式快餐店及咖啡室，普羅大衆要舒適的聚一聚，都會去冰室飲杯咖啡或紅豆冰；而現時大部份仍以冰室自居的，都是一些歷史悠久，經得起時代巨輪考驗的老舖老牌子，當中有些堅持著舊式風格，以老舖自居，期望在現今飛漲的物價及租金中努力求存；而另有一群則會較為進取，將一些新潮元素融合舊有品牌，希望創出一條新血路、新戰線，這間冰室算是其中成功的一員。

這冰室原先扎根於港島筲箕灣超過40多年，於幾年前因經不起租金及多方成本壓力而被迫光榮結業。

及後於2013年將品牌重新包裝，於西環捲土重來，現時連灣仔也開設了分店，小弟之前亦去試過，裡面的裝飾充滿著我們的集體回憶，仿鎢絲燈泡，昔日新聞剪報，懷舊港式漫畫，康樂棋，西瓜波，銻漱口杯，鐵製掛信箱，還有乒乓波板做成的menu，全部都甚有特色，讓人瞬間重拾童真。

今次我哋一共試了：

懷舊學生餐-炸雞肶香腸飯配黑椒汁
炸雞肶醃得幾入味，但炸得不夠香脆；香腸是小時候成日食的雞肉腸，配埋香濃而不太辣的黑椒汁，雖不至十分好味，用料亦普通，但確實飯如其名是以前中學時代因飯錢有限而成日食的飯盒配搭，感情分搭夠，讓人重溫舊日豆芽夢情懷。

蝦醬牛肉炒飯
淡淡的蝦醬味，略嫌不夠濃郁；炒飯夠鑊氣，唯飯粒不夠乾身但尚算清爽，配上菜粒，調味得宜，炒得亦不油膩，整碟飯算是合格出品。

豉汁蒸青斑
根據老闆説他們每天都從街市新鮮入貨，且只會買入數條，所以先到先得，賣完即止。做法可選清蒸，豉汁蒸，古法蒸，煎封等，而今晚我哋揀咗豉汁蒸，青斑蒸得僅熟，肉質嫩滑，沒有腥味，食得出是新鮮魚，豉汁調味不算太濃，沒有遮蓋了魚嘅鮮味，反而帶出點點鹹鮮，帶出魚味，冰室廚房有此功架出品，確有驚喜。

咖喱牛腩飯

咖喱偏甜不辣帶點果香，不會太濃烈太油膩，味道似日式咖喱，牛腩牛筋炆得鬆化軟糯，夾埋一齊香濃開胃惹味鬆軟兼而有知，配埋白飯完全perfert！

除咗食品外，還有提供一些懷舊飲品，好像黑牛，雪糕紅豆冰，西班牙咖啡，雪山菠蘿冰/雜果冰等，這些童年時冰室的經典特飲，讓我哋想起一幕幕動人嘅回憶片段。

除咗蒸魚價錢較高約$88外，其餘食品平均約$50-60左右，尚算合理，大家下次嚟開灣仔或西環都可以去試吓，順便感受吓那些特色懷舊裝飾吧。