清熱降火茶

今日去藥材鋪買材料煲湯時，店員哥哥就教我煲依個清熱降火茶，見簡簡單單咁又試下煲俾小小豬清清熱啦~

其實我都成日煲涼茶俾我家中老細，不過我個小小豬老細一向對黑卒卒涼茶都好抗拒。

每次佢一見到就都唔多願意，好似好辛苦咁先飲晒，所以多數都係煲竹蔗水、粟米水俾佢飲。

今日就同店員哥哥傾開計，佢就教我煲依個清熱降火茶，唔會黑卒卒但對清熱氣好有幫助。見好嘢就當然想試下，所以就執一份藥材煲啦！

材料有：蘆根、茅根、麥冬、白芍及甘草，同店員講大約幾多人飲，佢就會幫你執份量啦~

首先將啲藥材浸洗~

放入藥材，之後加入5碗清水~

待水煲滾之後，轉用小火煲40分鐘~

飲得啦~

哈哈哈...唔係黑卒卒小小豬都已經唔抗拒，嗅落就有少少麥冬味，但入口就唔多覺有啲咩味，有少少蔗味咁啦，但完全唔難飲，小小豬好快就飲晒成杯啦！

店員哥哥話依個都好啱小朋友飲，不過藥材方面都係好因應個人體質，所以記得煲之前了解下自己，或者問下相熟藥材店職員，依個藥方啱唔啱你飲呀！