興奮搵食到西環

其實我地真係好少嚟西環，就算依家有港鐵直達我都係未嚟過，不過今日就有依個新嘗試，因為約左朋友嚟一間剛開業嘅餐廳 - Cafe 2，開心食食聚下啦~

唉...一向路痴的我，今次又嚟搭錯車。原本應該係西營盤站出，再行多十分鐘左就可以嚟到Cafe 2。點知傻傻的地就去左堅尼地城站，所以最後我又要搭返車去西營盤再行去，足足遲左二十分鐘，真係勁唔好意思要朋友仔等我咁耐~

整個餐廳環境都好舒服，牆上仲掛左唔少西環嘅懷舊圖片，都幾有意思呀~

哈哈哈...遲到有遲到嘅好(不過我下次唔會啦)，因為坐定定就有嘢食啦！

首先嚟嘅就係生蠔拼盤，隻隻生蠔都好肥美，而且係即叫即開，所以特別鮮甜，食兩隻都有啲唔夠喉呀~

接住都係廚帥併盤，有煙三文魚同意式風乾火腿，兩者味道都唔錯呀~

依個周打蠔肉湯可以話係其中一個驚喜，湯內有一隻肥啫啫蠔之外，就連湯入口都有好香嘅蠔味，不過我覺得如果可以淡味少少，咁就一定更加好飲呀~

再嚟德國腸拼盤，唔好睇少依碟腸仔，因為佢嘅分量都幾大，而且三款腸仔都有唔同味道。我自己就最鐘意食帶有黑椒嗰款，辣辣地幾醒神呀~

飲左個好味嘅湯，又食左兩個頭盤，係時候都我地嘅主菜出場了。首先就係店員推介嘅招牌羅馬PIZZA，味道又真係幾好，尤其係佢個薄薄餅底，入口脆卜卜好得意呀~

之後就到炭燒銀雪魚及原隻鮮魷魚，依個真係可以話係我全晚心水選。銀雪魚非常嫩口，而魷魚嘅肉質就好軟屬，完全唔會覺得韌，食嘅時候配埋個泰式醬汁，超惹味呀~

另外我地都叫左個松露辣海蝦意大利飯，不過依個飯就有啲奇怪，因為有朋友仔就話幾好食(哈哈...我係其中一個)，但有啲就話個飯好淋身，完全唔似食緊意大利飯。店員可能聽到我地嘅談話內容，所以就主動嚟同我地解答。原來佢地出品嘅意大利飯係刻意比平日煮法加多啲水去煮，原因係因為佢地都有好多街坊嚟食，好多時都係一家大細，所以煮淋啲啲就可以方便小朋友同老人家進食。估唔到佢地又幾細心，就依一點都抵俾個GOOD佢啦~

其實都真係食得好飽飽，不過女仕總係有另一個胃嚟食甜品，所以最後都係叫個焗棉花糖薄餅伴雪糕。PIZZA一向都係咸點，我都係第一次以PIZZA嚟做甜品，脆卜卜嘅PIZZA再加上棉花糖、士多啤梨及雪糕一齊食，個口感又真係特別哦~

開開心心又食左一餐豐富嘅晚餐，真係好滿足，全職媽媽都要有放鬆時候嘛！(不過，都要非常多謝老公放我出去玩一晚，幫我湊住隻豬厭豬...哈哈哈)