【自家製】黃豆木瓜雪耳煲豬骨

突然好想飲湯，見有時間就煲黃豆木瓜雪耳煲豬骨，實行潤一潤先得~

其實我開頭都只係想煲雪耳，仲考慮緊煲咩好，就係我去藥材鋪買雪耳時，藥材鋪嬸嬸見到同行嘅小小豬時，就教我煲依個湯，話對小朋友好好，可以健脾益胃同清熱潤肺。

一聽到啱小朋友飲，見又好似好簡單，當然即刻買齊材料返屋企開工啦！

材料包括：雪耳兩朵、木瓜1個、黃豆約半飯碗、豬骨約$40、蜜棗2粒~

將豬骨洗淨汆水，木瓜刨皮洗淨後，切件備用~

雪耳浸透，用剪刀剪去硬蒂，撕成小朵後備用~

黃豆用水浸洗半小時備用~

煲內放約2L水，然後加入所有材料，先用猛火煲半小時~

之後轉用慢火再煲一小時~

最後下鹽調味，可以飲得啦~

成日都以為黃豆只係用嚟整豆漿，我都係第一次用嚟煲湯。估唔到加埋一齊煲，個湯清清甜甜，入口都覺得好滋潤，嬸嬸真係冇介紹錯。

飲湯之餘千其唔好漏左啲湯料，因為啲雪耳用木瓜都一樣好食呀~

小小豬都好鐘意飲，仲飲左兩大碗添。不過講起啲雪耳，佢又有件攪笑事。初時佢唔鐘意食啲雪耳，但當我同佢講食左雪耳會靚仔之後，佢就即刻密密食，大大話話都食左差唔多有十小朵，食完仲不停話自己好靚仔，真係俾佢笑C呀！

雖然雪耳係好味又有益，不過都要再提多大家煲過嘅雪耳一定要即日食/飲晒，如果隔夜，經過一夜嘅浸透，佢就會放出一啲有害物，到時就有益變有害啦！