兩母子豐富午餐

去APM買嘢諗住順便食埋午餐先返屋企，正當我未慮食乜時，小小豬就提意去上次食過嘅八月天，就係咁...我地就去食個豐富午餐啦~

我地嚟到時剛好係午膳時段，所以客人都比較多，服務員姐姐見到有小朋友在場，都好快為我地安排入座，仲俾左個好舒服嘅梳化位我地添。

小小豬話要自己睇下有咩食先~

先嚟隨餐附上嘅多士同湯~

忌廉磨菇薯仔湯，味道都唔錯，入口都會飲到好多薯仔茸，如果可入滑身啲，應該會仲好味呀~

我兩嘅餐飲，當然又係離唔開橙汁同薑蜜~

小小豬嘅蕃茄乾吞拿魚長通粉~

個醬好香蕃茄味，而且吞拿魚嘅份量係好多。小小豬已經密密食，都好似食極都有仲有好多呀~

最後....佢又一個人KO晒成碟長通粉，佢仲同我講話好好味哦~

我嘅韓式黑蒜煎豬扒配焗薯~

成日都以為韓式醬係會好辣，但原來依個係一啲都唔辣，仲帶有少少甜添。個豬扒肉質都好鬆化鮮嫩，好JUICY呢~

兩母子食左個豐富午餐，食到飽飽咁離開，真係好滿足哦！

依個小小豬嘅胃口越嚟越大，好多時都係自己一個人食一個餐，有時仲食得多過我添。不過，點解佢仲係食極都唔肥，仲好似越嚟越瘦，真係唔知發生咩事。唉.....或者係佢運動量過多(我指係佢跳跳紥冇時停)，所以消秏晒啲體力啦！

唔諗咁多啦，只要小小豬身體健康，係唔係肥嘟嘟都冇所謂啦！