【進擊的巨人二人餐】自己拉芝士骨　自己扮巨人~衝呀!

《進擊的巨人》嚟啦！！ 雖然我沒有追看漫畫， 但動漫改編的電影一定捧場， 更何況今次是由阿太偶像三浦春馬主演。

「主題餐廳痴」的我， 通常一聽到有期間限定概念餐廳， 一定心跳加速， 心痕痕想第一時間去玩。 (咁啱餐廳的PR姐姐竟然叫我去試食...正到痹啦！)

(係咪可以同艾倫， 米卡沙， 同巨人集郵架？ 有冇可以撕開主角阿媽， 放佢入口的定食架？)誰知PR姐姐答:「無架， 不過有Figure， 同道具借畀你影相囉)

失望中的我心諗:「吓！咁唔係好主題餐廳咋喎」， PR姐姐回應:「食物好正架， 我寫包單你一定唔會失望...信我」(可能無期望， 今日又幾好玩喎)

首先每款二人套餐也包一筒「推進器」飲品 (單點HK$88)，我問Ceci:「一筒可以有幾多杯架？ 」她答:「最少都有8杯嘅」(咁都算抵喎)

三款口味我都有幸一試...信我！！ 要飲一定飲混了藍蝶花的荔枝， 但記得加凍， 否則真的會太甜。

自己噴射自己飲， 好玩好多. 如果想噴出更強效果， 搵朋友抬高推進器， 你再按發射制， 果汁有更強進擊感覺。

進擊指數: ★★★

這裡的5款二人進擊套餐， 份量之大， 簡直三個人食都一樣會飽。可惜， 不能辣的我， 無緣一試艾倫身後的「憲兵團辛辣部隊鍋」， 及「巨人の韓美人鐵板鍋」 ， 唯有影影相就算。

「富士山芋溶鍋」登場後， 龍哥就將一碗透明東西倒入鍋內， 我問:「你倒啲咩入去呀？」 龍哥:「我哋所有熱鍋都會滲入一碗『骨膠原啫喱』」(嘩！唔掛得知個湯底咁「杰」， 咁「膠」啦)

龍哥:「『杰』係因為我哋仲有山芋， 所以成個鍋啲味都好濃」(我只係知...我專登飲完三碗湯， 成身皮膚主觀感覺似「知蛋咁彈」...哈哈哈)

進擊指數: ★★

之後就是「進撃の芝士排骨」， 其實跟平常食的邪惡拉骨沒有分別， (哦！只係改咗個名咋 ？？)

龍哥:「唔係架...我哋好主張互動， 所以出面全部都係店員幫你拉， 但我哋可以畀客人自己拉架」(咁正？？教我！教我！)

原來左手用夾鉗實排骨， 右手用筷子轉上被熱用的芝士， 就可以...不過店長Maggie:「可能你好鍾意食芝士， E個份量差唔多係圈兩舊排骨架喇」(咁我可唔可以添芝士呀？？)

「芝士排骨」通常也是附上炒飯， 龍哥:「炒飯一樣可以我炒， 或者客人炒都得...」(5份套餐， 最平就係E款$246， 我覺得最抵食就係佢)

進擊指數: ★★★★

進擊の鐵人燒肉 HK$334， 由豬扒， 豬肩， 豬腩片， 豬頸肉， 豬柳組合而成...龍哥邊煮邊推介:「豬腩片最易熟， 又多油，  豬頸肉就較難處理」 (今日真係又有得食， 又有嘢學， 著數晒)

龍哥推介:「諗啲， 肉味濃啲一定揀豬肩啦」(啱晒我喇， 無牙咬都好夠味)

未試過拉骨， 玩一玩就得意， 但燒肉經常可以燒， 所以， 還是將任務交還龍哥負責。(我啲咁嘅懶鬼， 都係坐係度等， 而且龍哥仲包埋生菜畀我食， 咁米仲好)

進擊指數: ★★★

最後就是「圍牆多士」 HK$128， 可能玫瑰花味還是合女士們口胃， 有機會下次都是點朱古力圍牆比較好， 我覺得玫瑰花有陣怪味...(不過我問同枱四位女士又無人聞都喎， 唔通我個鼻真係有問題？)

電影有巨人衝入圍城， 今日我一樣見証四人極速拆牆， (其實佢哋係咪同棟牆有仇？)

如果要比較， 我還是覺得Yamaton的鹹食燒肉， 及芝士拉骨都較甜品好味道...可能配搭問題吧！

進擊指數: ★

我問龍哥:「你哋有冇衫借嚟影相架？」結果除了艾倫件軍服外， 更有雙劍可用...(食客都隨時可以借嚟影相嗎？？) 龍哥:「我哋得閒， 而佢又唔介意著咗我件衫， 無任歡迎啦」

臨離開前， 巨仁出來了...店長Maggie話:「你可以係後面扮食啲Figures...效果會好似架」(原來我戴咗個巨人面具靚仔好多喎...我諗我要買多幾款面具， 之後戴住出鏡， 效果會無咁趕客)

地址：旺角 Grand Plaza雅蘭中心