【貓頭棉花糖】勁殘忍!! 食咗隻貓落肚

「喵~貓怪上咗棉花糖身呀！喵~快啲嚟同佢做朋友，收集佢哋個徽章啦！~喵」

日本「貓部」得意限定~8月份日本東京車站「一番街」行人走廊擺設車仔檔，賣靚到爆炸的貓貓頭棉花糖。

除了搶眼度極高的貓貓棉花糖，車仔檔還有散紙包、環保袋、貼紙等精品。

（話就話「貓部」會將收入1％捐出支援貓狗保育行動，但其實全檔的售價也直迫中環價錢，貴到死）~ 其實， 個人覺得捐得太象徵性式就真！

不過， 食得鹹魚抵得喝，食得搶眼抵得貴， 3粒¥1404，6粒¥2052，12粒最抵¥3024。

$22一粒朱古力棉花糖，抵食與否，見人見智。（阿太：「車！你唔買夠12粒？平咁多」）~而且12粒裝中， 有一半的貓樣更不設散賣添。

老實說：「去旅行玩吓試吓梗係無所謂，話晒個貓樣夠煞食，不過食12粒實甜死， 因為一粒都已經勁甜」

一向被「糖怪」、「朱古力怪」上身的SY， 在火車上不停問：「貓仔棉花糖幾時食得？（返到屋企先啦）唔好啦，我想食先呀！咁得意，我好心急」

之後SY好似儍人上身自言自語：「黃貓你好香呀！ 我真係唔捨得食你，（咁你儲囉）。爸爸，你唔好講笑啦，棉花糖唔食？要嚟儲？」

(咁我哋不如大大力對付完貓怪先食佢啦！) SY:「唔好啦！ 我唔想整爛佢，爸爸你好殘忍，(咁你食咗佢一樣殘忍啦)，唔會~我放咗佢入肚啫」

貓部其實很懂做生意，除了東京有歌舞技限定3粒裝、橫浜限定文明開化貓樣、名古屋則限定戰國武士樣。（無錯！一定焗你買3粒最貴裝）

其實，棉花糖算甜，如果用來送咖啡，好似適合我多一些喎。

而且好攪笑， 貓頭棉花糖放入咖啡慢慢溶開， 經過數分鐘時間， 原來3D的貓頭， 自自然然溶入面層泡沫， 十足被人活生生打扁一樣。(我覺得咁樣仲殘忍就真)

名古屋高島屋 10/F：2015 年 8 月 5 日 - 18 日

東京駅一番街B 1/F ：2015 年 8 月 7 日 - 31 日

SOGO横浜店6/F：2015 年 8 月 18 日 - 31 日

渋谷ヒカリエ ShinQs 2/F：2015 年 8 月 20 日 - 9 月 2 日