暑假特工大聯萌

我地約埋SY哥哥一齊去挪亞方舟，主要係去做打工仔，齊齊參加《暑假特工大聯萌》呀~

其實我之前成日都好想帶小小豬去玩返工，等佢可以親身感受下各行各業嘅工作，等我問佢大個想做咩職業時都識答嘛。

不過其他機構嘅收費都不菲，我又唔知小小豬第一次玩時有咩反應，咁貴入場咩都唔肯玩咪唔抵。再加上影相控的我又唔可以幫小小豬影相，所以依啲返工活動我一直都係得個諗字。

之後係FACEBOOK見到挪亞方舟係暑假都有舉行同類活動，只要購買入場卷，唔需要再額外加錢，即係百幾蚊就可以玩盡五大職業，咁抵當然要嚟玩一轉啦！

我記得對上一次嚟馬灣都係剛剛結婚兩口子入嚟拍拖影相，當時就好似只係去左馬灣公園，當時挪亞方舟仲好似係起緊，所以今次我都係第一次嚟玩呀。

成日以為嚟馬灣係好難，但原來依家係旺角都有旅遊巴直接去挪亞方舟，唔洗半個鐘就入到去啦~

哈哈哈...入場啦，由於未夠鐘返工，所以兩位小朋友就化身成為導遊，拎住個地圖帶我地周圍行呀~

係未開始返工時，各位小朋友都會有一本活動通行証，除左有齊各項返工資料及換籌時間表之外，仲有由著名親子教育專家張笑容女士所設計囓「兒童品格強項中文問卷」，我地家長從觀察小朋友返工表現後填問卷，計下小朋友全日表現值幾分，可以有助了解你小朋友嘅性格、優點及能力呀~

小小豬今日第一份工就係做一個小小消防員，唔好以為只係玩，消防教官第一步就係教導小小消防員一啲消防知識，唔好話一班小小消防員，就連我地旁聽嘅家長都學識好多嘢呀~

消防教官仲請一位小朋友出去示範當身上有火時應該點做，估唔到小小豬會主動舉手 ，仲做得唔錯哦~

聽完理論課，消防教官仲即場示範正確使用減火筒(哈哈哈...我自己都係第一次見呀)~

最後就係模擬實戰，我地一眾媽媽就扮被困火警現場，一班小小消防員要帶我地及逃生三寶（鎖匙、電話、濕毛巾）一齊走過煙霧瀰漫嘅火警現場。當入到煙霧體驗區時，真係好逼真呀~

最後當然唔少得齊齊去救火啦~

小小豬依個小小消防員LOOK又真係幾有型，而且佢嘅表現真係有啲喜出望外，所以忍唔住俾個GOOD佢啦~

第二份工就文靜少少，做一個小小護士，學習照顧BB呀~

初頭小小豬都唔太願意去湊BB(可能剛才小小消防員實在太興奮了)，不過見到SY哥哥換上護士制服，所以佢就肯跟埋一齊乖乖換衫。

先嚟由護士長教各位小朋友抱BB...同BB換衫...洗白白啦~

之後就到各位小朋友實習，先嚟同BB量下頭同身先~

然後除衫去洗白白，依個不細心嘅小小豬將個BB倒樹蔥咁，真係嚇C人呀~

無從入手嘅小小豬最後要護士長幫手一齊幫BB洗白白，之後去磅重~

最後就同BB著返衫仔~

最後就餵BB飲奶同掃風，當然小小豬又係粗魯咁對待BB啦，不過旁邊睇又真係幾好笑呀~

一向小小豬都係唔太鐘意玩BB，所以佢做得唔好我都唔會怪佢。不過係佢唔太願意做嘅情況下，又可以做到護士長嘅指示，只係粗魯啲咁解，所以我都當佢合格啦~

返左兩份工，唔好話兩位小朋友，我地大人都又攰又肚餓了，所以就齊齊去食個午餐休息一下啦~

兩位小朋友食完飯仲齊齊畫畫，好開心哦~

食飽飽又未夠鐘返工，就去玩下泥沙開心下，當然都係免費啦...哈哈哈~

食飽飽有氣力就可以返工，今次就去做醫生，真係未開始先興奮，兩位小朋友換好衫就已經玩不停啦~

一開始醫生姐姐就教小朋友一啲醫學常識，依兩位醫生姐姐講得生動又攪笑，所以唔止小朋友，我地家長都俾佢地吸引住呀~

學左醫學智識咁就要嚟實習下，由我地媽媽扮病人，小醫生幫我地睇症呀~

小小豬都扮到似層層，仲好詳細教我點食藥添~

做完門診就到入手術室，幫病人做手術啦~

好認真嘅小小豬幫病人做手術中，其實只係好簡單咁夾走啲粒粒，不過我地旁邊睇又真係幾得意呀~

小小豬做小醫生表現都唔錯，都算跟足晒所有程序，又好專心咁上堂，最攪笑就係又嚟每事問，醫生冇介紹大腸同小腸佢都會好主動咁問，佢嘅求知欲真係越嚟越大，不過某角度嚟講都係一件好事嚟，所以都俾個GOOD依個小醫生啦~

終於嚟到今日最後一份工，就係去做小警察，但原來最受歡迎就係依份工，因為真係好多人參加呀~

警長先同啲小警察講解警察平日工作~

然後就教小警察步操啦~

之後就摸擬場景，請小警察幫手解難，小小豬都好主動舉手，仲同SY哥哥一齊救出傷者呀~

最後就當然去到各小警察最期待環節，就係去射槍啦~

玩左成日其實小小豬係返小警察時，都已經係"謝謝地"，不過都總算佢堅持乖乖地完成，所以都要俾個GOOD佢啦~

總括嚟講，小小豬今日返工表現都真係比我預期中好好多，都算聽導師話又肯去做，只係有時問題多左啲啲，同坐唔定啲啲，不過都算唔錯啦！

就係四份工嚟講，小小豬最鐘意次序係..消防員 ~> 醫生 ~> 護士(真係估佢唔到哦) ~> 警察，依家問佢大個想做乜，佢就好快話要做消防員，因為可以去救火(其實我估係因為有得玩水就真)！

其實仲有一份係小鑑證員我地今日冇去返工，因為玩左成日，唔好話小朋友，我地幾個大人都攰都唔願郁。其實今日我地今日全日都係去返工，挪亞方舟都仲有好多地方同工作坊冇去睇，所以留番下次啦，咁好玩地方小小豬話下次要再埋DADDY一齊玩呀！

不過，都要提一提佢地幾位導師，其實佢地同小朋友一樣扮演各職業，但佢專業同認真嘅講解，令我初時都以為依啲係佢正職，係後來我忍唔住問先知原來佢地嚟教堂時，之前都受過真正專業人仕訓練，所以先咁似模似樣呀！

真心推介依個活動俾大家，可以係遊戲中學習，價錢唔貴之餘又可以學到一啲專業智識，所以趁仲有半個暑假時間，搵日入去學返工啦！

等我俾少少溫韾提示大家先：

- 由於活動係需要係指定時間同地點換取各職業入場籌，每場名額20個，一啲熱門工作仲好快FULL，所以我地媽媽們可以做定功課，去挪亞方舟網址睇定換籌時間表，咁就可以教啱時間，打多幾份工啦！
星期四及五時間表：http://www.noahsark.com.hk/tra/pdf/promotion_105_poster_thur_fri.pdf
星期六及日時間表：http://www.noahsark.com.hk/tra/pdf/promotion_105_poster_sat_sun.pdf

- 另外小朋友衣著我覺得都係薄衫褲為主，女仔都唔建議著裙仔，因為啲制服係即時穿上面衫上，所以入面薄啲會舒服啲，行動都方便啲。小小豬就係因為著住POLO衫係底，所以攪到又熱又肥呀！不我見每次小朋友著完啲制服後，工作人員都會噴上消毒劑，所以都可以放心嘅！

- 講多樣優惠俾大家知，用指定信用卡(都係匯豐..恆生..中銀嗰啲)係挪亞方舟正門售票買入場卷，仲可以有正價85折優惠，折左都係成人$143/小童$118(唔知我有冇記錯..HEE HEE)，仲唔係好抵！

 暑假特工大聯萌

 https://www.facebook.com/kinseymama