灣仔不加味精的隱世新派粵菜

我們一班朋友因工作關係各有各忙，偶爾才能出來一聚，所以每當約齊人出來食飯，我們都會搜刮一些美味又方便傾談的食市，讓大家可以舒舒服服聚舊一番。而今次有朋友發掘了一間灣仔樓上食市聚餐，遂一行人向灣仔進發。此餐廳藏身於灣仔國華大樓（大公報），位置雖離地鐵站不算太近，但交通尚算方便，大廈入口位處巷仔之中，有點隱世食市的感覺，對於我們這些喜歡尋幽探秘周圍搵食的一族，不期然產生一定的寄望。

說實在話大廈位置同入口真的不甚討好，但倒轉來說這也是在時下飲食文化前題下的一個selling point--我們現時通常要找的食市不是要那些華麗堂煌人所共知的餐廳，而是希望找到一些隱世的，只有少數人知曉的地方，那樣我們帶朋友去惠顧才有“這裡只有我知道”的優越感嘛！

上到餐廳，感覺截然不同，清幽整潔，雖不是雕龍雕鳳的典雅裝潢，但勝在簡約舒適，看得出下過一番心思。今天朋友已預先訂好菜，是一圍原先12人的菜單，但我們只有六人，老板說幫我們轉做半席也可以，夠彈性，加分！

今日的菜單有8餸1湯：

頭盤4小碟

起初上枱見到以為是普通行貨，因都是些陳醋雲耳，手拍青瓜之類，創意欠奉……但試上一口便知龍與鳳，陳醋雲耳用上意大利黑醋配上蒜茸涼拌，調味剛剛好，不似一般的死酸醋味，味道多了1個層次，連我這個食肉獸都追住來吃！另外一道蒜香素螺肉，炒過的素螺肉上面灑上炸金蒜，清淡爽口得嚟配上金蒜的惹味，清香濃集於一身！手拍黃瓜雖談不上什麼特別，但勝在夠新鮮脆口調味好，水準之作！不似外面有些食市連最基本要揸乾黃瓜的水份都未做到，上碟時還帶著大灘水在碟中。而個人覺得最值得一提的是酥脆松子金粟，以粟米粒松子略炸脆調味上碟，看似簡單，但火喉控制得宜加上調味適中，啖啖都是粟米甜松子香，此小碟來到不消一會已眨眼間掃清，手快有手慢冇！

精制焗蹄膀

蹄膀肘子也，一般中式做法多以燜、鹵或紅燒為主，而這裡創新以焗的方法來煮，皮脆肉香，外皮香脆鬆化，內裡咸香啖啖肉，配上意大利黑醋，整體一點都不油膩，加上伴碟的沙律菜，一清一濃，回味無窮。

原盅蟲草花炖豬湯

足料之作，蟲草花滋肺護肝抗心氧化，配上瘦肉雞腳同餚，湯清味濃起膠，火喉十足。

九層塔香草炒海中蝦

以新鮮海中蝦配上九層塔同炒，新鮮海蝦肉嫩夠Q彈，九層塔香味清新，只是提鮮而不會太搶，味道剛剛好，是外面比較少見的配搭。

雲耳蒸沙巴躉頭腩

沙巴躉切成大大件頭腩，佐以雲耳果皮絲同蒸，蒸魚火喉剛剛好，嫩滑多汁，果皮絲滲出淡淡陳香，辟去魚嘅腥味，而配上雲耳的主要目的，當然係利用雲耳吸味的特性，吸收哂D魚汁，爽脆惹味！

野菌扒自家制豆腐

野菌先以燒汁煨煮入味，配上口碑極好自家制豆腐……係，你冇睇錯，係自家制豆腐，呢度的豆腐係自己私房特製，滑溜得嚟滲出啖啖豆香蛋香，有點似玉子豆腐的感覺，但當然好味滑嫩程度就勝過唔止數倍啦。整個餸只有一個字形容——正！

古法鹽焗雞

鹽焗雞在外面食得多，大都是將雞醃完炸脆上碟交行貨，而正宗古法製係以原隻雞埋入鹽堆中慢慢焗熟，讓咸味慢慢滲入雞肉當中，確保精華唔會有一點流失，保持著原汁原味。而呢處的鹽焗雞就正正帶著點點懷舊菜味道，用上原隻新鮮雞，雞味十足，鹹味剛剛好，讓我有機會再重溫濃郁雞味遇上鹹香那種味覺享受。

鲜茄濃湯浸菜苗

上湯菜苗，一般食市都有供應，但這裡的卻多了一份貼心，除了上湯用上金華火腿餚製外，菜苗很明顯亦是用心揀選過，條條嫩綠非常，連番茄都是已將皮除去，窩心非常。喺食咗咁多肉類餸菜之後，來一道這樣清淡的菜餚，頓然感覺煥然一新。

薑米蛋白素粒炒飯

薑米炒飯，俗稱大肚婆炒飯，因大部分孕婦在生育之後，都喜歡以這個炒飯作調理之用，有驅風安神之效。而這個薑米蛋白素粒炒飯，可算是大肚婆炒飯的變奏版，將用來炒飯的雞蛋變為蛋白，減去蛋黃的膽固醇，適合現代人注重健康的習性，另加入素粒增加口感，唯一冇變係仍然放入薑米 ，使飯粒滲出薑獨有的清香，飯炒得夠乾身唔會油膩，粒粒分明爽口非常，讓人見到聞到都會食指大動！

土魷蒸肉餅

原先菜單上沒有這個餸，係老闆見我哋全部幾個都大大件，驚我哋唔夠食，加上我朋友極力推介，所以送俾我哋食……食落真係幾好味，好明顯豬肉係手啄的，肉粒分明有咬口，不是一般絞肉貨式，還加入了馬蹄，食起嚟爽口彈牙，屬手工心機之作。

最後還有木瓜雪耳糖水作個完美句號，呢個糖水特别在加咗薑落去煲，清潤得嚟帶少少薑嘅香同辛辣，幾得意，我鍾意！

總括而言整個餐單都是水凖之作，最重要係真的完全冇加味精，食完唔會勁口渴，夠健康！加上老闆處理夠彈性，你想到的佢都會盡力配合，人情味濃，令你有好似私人飯堂咁嘅感覺……而價錢每位消費都只是$260左右，中等合理，但在灣仔區來説，算是物超所值了。我哋巳經訂定下個月再嚟食，相信之後我哋都會成日嚟捧場！