大圍都可以食到韓國菜? (梗係楊洲炒飯加泡菜就話韓式啦!!) 結果, 毫無期待下, 驚喜一浪接一浪。

位於新翠邨商場的Sister Korea Café, 由大圍站步行過來大約10分39秒。(第一次來, 我真係有計時...算可以接受的距離啦)

約19:00到達, 嘩! 大堆街坊已經圍著門口等叫號碼, 20張籌...輪候時間都算快, 只是等了30分鐘。(話晒屋邨商場, 有人龍已經算誇張啦!)

浦坐下卡位, 心想:「好似去咗韓版吉野家...流流地咁款喎」, 我見鄰桌點了奇怪飲品, 於是問店員:「真係原隻菠蘿畀我㗎?」

店員家倫:「真係㗎...你有冇興趣入廚房睇睇??」(我咁八卦, 梗係求之不得啦...)

家倫專登選了一個大號菠蘿給我作示範...(真係十幾箱菠蘿疊到人咁高喎)

阿軒一邊切菠蘿, 我一邊問:「係咪你哋抄青衣大戲棚個西瓜特飲呀??」

家倫:「唔係喎...E個菠蘿沙冰係韓國好普遍㗎咋, 通街都係, 可能香港無人整啫...」(未去過韓國嘅我, 仲以為新嘢...真係好OUT!)

阿軒手執專用刀扭出原個菠蘿肉, 將菠蘿心棄掉, 之後加冰加水, 連同菠蘿肉攪伴變沙冰, 再倒回入菠蘿就成為原汁原味的菠蘿沙冰。

軒:「一日平均開百幾個菠蘿...(吓??咁咪開到手痹?), 唔會, 我哋有三個同事一齊, 不過另外兩個去咗食飯啫」(日日撬30個菠蘿都幾係嘢)

家倫:「其實, 我哋通常下晝5點幾就開定D菠蘿, 所以唔駛佢哋三個咁趕囉」

之後阿軒又製作另一特飲給我...芬達士多啤梨冰, (真係成支芬達塞入杯沙冰入面...我又係第一次見咋..)

家倫:「本來韓國係塞啤酒, 不過我哋未有酒牌, 所以改咗啱小朋友嘅汽水」

(你哋開咗好耐㗎喇?) 家倫: 「我哋只係開咗一個星期咋, 係兩個老闆, 一個韓國人, 一個台灣人夾份, 老闆日頭先係度嘅」(其實我最想知老闆點解開間舖係屋邨...)

菠蘿沙冰好搶眼, 又夠甜, 不會太酸, 而且就附又兩片菠蘿肉, 絶對是2人份量。($58蚊鮮果汁特飲...超抵啦...我見真係枱枱都叫架)

本來阿囝很高興和我分享原隻菠蘿, 但當他的朱古力特飲一登場, 他二話不說轉了會。(成條大肉腸咁....非常震撼嘅棉花糖插係杯特飲上面)

阿囝:「嘩!好得意呀!有舊雲㗎...咩嚟㗎??」(棉花糖囉!! 放心一定唔會係你最憎嘅芋絲啦...唔駛驚)

心急得即時又飲又食的小朋友, 立刻豎起母指:「好好飲呀!! 棉花糖真係好好食添」(棉花糖唔係全世界都一樣味咩? 點解你食飯又無食得咁快?)

至於我的芬達沙冰則太似巴黎鐵塔, 反轉再反轉, 我每吸一口, 上面的芬達又會即時補充, 其實似同一時間飲兩支飲品。

之後便由真正的韓國人Ellie, 親自為我們炒「漢拿山芝士蛋溶岩豚肉炒飯」(Yeah!! 即場表演, 也只收$128, 絶對值回票價)

原來Ellie已經來了香港兩年, 因為認識老闆, 所以被邀請來幫手, (你一日要炒幾多碟飯㗎?), 「每日都要炒10-15碟飯」。

不好意思...因為我實在太想自己也炒一炒...阻礙了Ellie的工作...

因為阿囝不能吃辣, 所以Ellie說:「無辣的畀小朋友食, 如果你想加辣, 可以放辣油同泡菜」(韓國女士真的又細心, 又有禮貌..)

最後一分為四份的芝士蛋炒飯, 蛋炒至半生熟, 如果不放辣, 味道是適中, 但一放少少泡菜, 簡直如同女士們化粧前與化妝後的分別... 好好食吖!!

阿太點的「韓式水冷麵」, 我一向不愛吃凍麵, 加上又放了醋...其實我「麻麻地」。

但阿太則非常滿意, 「味道好過賣相好多, 好食喎...」(我唔多啱食, 明明麵係要熱食, 點解夾硬變凍食, 好奇怪)

最後的「泡菜煎餅」, 之前在元朗阿朱媽吃過, 念念不忘, 今次一樣可以吃到差不多的味道, 但就寫明小辣。(我懷疑當日阿朱媽專登為阿囝走辣)

我實在太愛吃薄餅類的食物,  (不過, 如果有得揀, 還是揀沒有泡菜的煎餅好好多啦)

非常飽的一餐, 三人捧著肚走也只是$387, 不收加一, 而且又有正宗韓國女店員為你炒飯. 如果同樣餸菜, 尖沙嘴韓國街最少收我$600.

今晚真的物超所值。(最衰我唔係住大圍...Ellie有機會先再入嚟探妳啦!!)

地址: 沙田大圍新翠邨新翠商場


 【街坊價嘆韓食】原隻菠蘿冰 + 韓國美女炒飯 絶配!!

 https://www.facebook.com/hayakutang