【自家製】南瓜番茄紅豆瘦肉湯

平日我多數都係煲蕃茄薯仔豬骨湯，但原來用南瓜番茄嚟煲湯，簡單的嚟又幾好飲，最好就係有好營養呀~

材料有南瓜半個、番茄4個、紅豆少少、陳皮1塊及瘦肉約$40~

南瓜去皮及瓤，洗淨後切厚件。記得一定要厚切，如果唔係煲完個湯就會冇晒啲南瓜呀~

番茄洗淨後切件~

紅豆洗淨瀝乾，陳皮去瓤用清水沖淨備用~

瘦肉用清水洗淨汆水備用~

煲內加入約2L水，然後加入陳皮~

待猛火煲滾後，放入所有材料~

至水再滾起，改中火煲約1小時~

最後加埋鹽調味，就可以飲得啦~

味道清清甜甜，再加上嗰一種淡淡嘅紅豆味，都幾特別，成一煲湯轉眼間就俾我地三口子清晒啦....哈哈哈！