【自家製】解熱袪濕茶

明知一粒荔枝三把火，食少少就好啦，點知返奶奶屋企做節時見啲荔枝好味，就越食越多。

終於貪食之過，食完之後即晚就已經FEEL到牙肉痛，再過多一日仲連食嘢都痛，所以即刻要煲返個清熱去濕茶，解解毒先得~

其實原本我都只係打算簡簡單單咁煲夏桑菊嚟清下熱氣，後來藥材店職員知道我嘅狀況之後，佢就介紹左我煲依一款涼茶，話效果仲好添，所以我就執一份材料返屋企煲啦！

材料只係需要夏枯草、白芍、云苓、白朮、甘草、竹葉及適量片糖。份量方面你同藥材店職員講大約幾多人飲用，佢就會幫你執份量啦~

將所有藥材浸洗備用~

於煲內準備8碗水份量，然後加入藥材~

待水滾後，用慢火煲約30分鐘~

最後加入片糖再煲多15分鐘~

大約煲埋有約5杯左右份量，待涼入樽放在雪櫃，因為雪凍左好飲好多呀~

依個涼茶真係要推介俾愛好荔枝嘅朋友，因為我飲左兩杯之後，牙肉真係冇咁痛，同埋個人又真係好似冇咁燥燥的，所以真係要推介依個涼茶俾愛好荔枝嘅朋友，咁就可以繼續食又唔洗怕好猛火啦！

溫馨提示：藥材依方面都係好因應個人體質，所以記得煲之前了解下自己，或者問下相熟藥材店職員，依個藥方啱唔啱飲呀！