A Music衛蘭與林夕的「小學雞傻女戀愛系列」

做人最大獲係「跟錯大佬」，或者衛蘭就係經典例子，入A Music 跟錯黎明，一玩玩左十年，終於走人同細妹衛詩加入華納——都算係咁，一直成績麻麻，但因為本身銷量好，歌入屋，聲甜樣甜，十年後仍然有價值，未至於其他A Music 歌手一樣完全沉船。

諗返轉頭，「他來自北京」的黎明就根本就係土豪性格及品味，A Music 走草根市井音樂路線，在廿一世紀成功做左一系列Windows Office 美學的經典封面及造形，人稱「飛圖美學」，除了電單車的衛蘭後，楊千嬅【原來過得很快樂】亦是樂壇經典，印完要即刻改版，迫到楊千嬅終於肯認真做返音樂，冇功都有勞。

不過咁，有一樣野我地都忽略左，就係衛蘭其實都係林夕歌詞的一大戶，集合了林夕的「西歌集」，超級melodramatic，極度煽情，用字極淺十分精簡，如果楊千嬅係林夕的一塊肉，有哂林夕最入肉最深刻的作品，屬歌詞界的文藝電影，咁衛蘭就絕對係歌詞界的TVB 婆媽劇，每個歌名都可以做TBB婆媽劇劇名，有齊林夕最天真最那西最WTF的作品，實屬林夕的「小學雞傻女戀愛系列」。不過唔好以為我係恥笑緊呢堆歌詞，林夕大部份填得雖然那西，但仍然見其文字功力及用字精準，有些更接近文言文的精煉，當中亦有不乏佳作。

2005年 【Day&Night】

音樂︰衛蘭2005年推出首張專輯【Day&Night】，雷頌德主理，主要翻唱黎明那些90年代聽到都cringe 死的所謂流行經典，結果憑終極口水歌《大哥》跑出，這奠定了往後Janice 的音樂路線，口水K 歌加翻唱黎明舊作的音樂主線，亦係注定衛蘭難以成大器的原因，大佬，聽衛蘭等如聽黎明喎，你問下身邊邊個會真係聽黎明啦除左隔離屋陳太黃太李太外同同班果個悶到死的女同學外。

封套評賞︰呢張snapshop算係唔難睇，但係個字形已經深刻咁將Microsoft Office Words的設計美學表現出來，唔駛講都知，整個設計當然即係想表達衛蘭係amateur 歌手。

2005年 My Love

音樂︰第二張大碟【My Love】開始搵埋另一K 歌大師伍樂城做歌，伍樂城《十個他不如你一個》變左做Twins，好彩林夕肉麻歌詞打救，

人人初戀得一次　太回味那時 人人自然自私　要耗盡才終止

前後完全冇關係，但又聽得人好似心痛咁，好勁架。

封套評賞︰走火入魔之作，個team 開始用Photoshop，整體簡潔左，字體揀得算好左，但衛蘭的洗頭水定化粧品廣告相完全九唔搭八，又唔靚又O嘴——睇漏左，個發光鑽石想點呀？係咪想激死人呀？

2006年 Do You Know…

音樂︰第三張【Do You Know…】，好坦白講，呢張碟已經好悶同重覆好難聽，不過至少有雷頌德o既《離家出走》跑出，係最精美，呢種pure，super sweet簡單的流行曲亦成為衛蘭的signature。林夕歌詞係《飛女正傳》的簡易版，一樣浪漫喎

別再管誰咒你　曾經荒謬闖蕩異地 亦未枉相戀超出煩惱的禁忌 視世上人不理 想早晚能見你　曾經反叛也是我運氣 天與地　年老了不再飛　無那份勇氣

其他歌，可以考慮睇TVB 劇mute 左聲然後播呢張碟d 歌代替做soundtrack，睇下你想熄電視先定係停播呢張碟先。

封套評賞︰呢張好d，似中學生作品，但睇得出用心左，同埋睇得淸衛蘭個樣，張相都幾靚，sweet sweet咁，算係咁。

2008年 Serving You

音樂︰喇，2008年呢張【Serving You】就係衛蘭的代表作，踢走左用Twins 做法畀衛蘭的伍樂城絕對係明智，今張雷頌德作多左，多左90s尾的偶像歐美輕快流行，算係咁啦，呢張碟係大家最有可能完整可以聽哂成張碟o既一張！頂住！仲有，呢張碟亦出左衛蘭的代表作，就係《離家出走》續集《就算世界無童話》，衛蘭的register 最佳，唱得最甜，唱得最到肉，亦最係衛蘭獨家的作品。當然，亦要多得林夕的歌詞，當年社會開始講正能量，果年林夕寫左一連串正面說教歌詞，幫楊千嬅寫的三首最能夠講出果年林夕的主線《大慈善家》、《塗鴉》及《一葉舟》。當然，《就算世界無童話》亦是林夕的說教正面佳作，以童趣幼䧽的歌詞寫出現實的矛盾及失落，但同時以樂觀天真態度來迎接。

如所有錯失都得到寬待 如計較會被換成慷慨 如純良仍然能被記載 孤苦的得到理睬 這可算妙想天開

另一首《雜技》亦係衛蘭另一佳作，衛蘭第一次唱到內心戲，唱出內心的徘徊，尤其副歌林夕的歌詞令人拍爛手掌︰

我不怕　死心不息愛你 表演討好的雜技 不惜更改性格都想配合你 施展魔鬼的嫵媚 加起修女莊嚴難以令你在意得到轉機 然後我　假裝瀟灑對你 偷歡偷不到妒忌 花心痴心竟然同樣不震撼你 哭泣表演可憐你嫌棄 大概正中你厭惡的禁忌 難道要我說我愛到想死 威脅若拒絕我便逼死你 又怕越快被你拋棄

「魔鬼」與「修女」的隨便及意象的粗疏與市井實在係大笑位，但又唔太笑得出喎，因為林夕寫得太入肉太細緻，到「難道要我說我愛到想死 威脅若拒絕我便逼死你」便突然又口語直接，其實好神奇的。另一西歌《你知道我在等你們分手嗎？》亦係情緒低落時的最佳選擇，你聽到中間個讀白你唔微笑？我唔信。

封套評賞︰喇，話明代表作嘛，梗係連封套都係最好啦，仲有illustration 喎，但又做到唔係扮文青，仍然保著果種shopping mall 宣傳廣告的格局，所以話，衛蘭真係好親民！佢亦都好簡單的，做空姐服侍你已經好開心，係咪好本土好踏實？

最後總結，喇，咁啦，其後衛蘭推出【Wish】新曲加精選後的果d 歌真係唔駛點聽，唔好side自己時間。林夕的作品亦過了【Serving You】的顛峰。前半期的A Music 的衛蘭doesn’t take herself seriously，冇乜大野心亦不扮野扮有型，幾討好架。【Serving You】都算係canton pop K歌同「傻女情歌」的一個小高峰，壓勝Twins及容祖兒。

好啦，最後我地欣賞經典的Wish封面同《就算世界無童話》來作結，bye bye 。

就算世界無童話 放下包袱完成它 就來學攀山者有心不會怕（好彩唔係行山o者）

作者：Damon