【自家製】光波黑椒豬手

早排見朋友仔整左光波黑椒豬手，見佢話好味之餘仲唔算難整，所以我又嚟偷師一下啦~

其實開頭我都以為係好難整，不過豬手我又未煮過，係我好奇心推使下，我就買齊材料一試啦~

首先將急凍豬手解凍，湯煲內加入適量嘅水及數片薑片。待水滾之後，加入少少燒酒及香葉，然後以中火烚30分鐘~

之後加入1罐啤酒，再煲15分鐘~

熄火後再焗15分鐘~

其後將豬手取出，風干表皮。依個都幾需要時間，如果有需要可以將豬手吹風扇呀~

待豬皮面乾身之後，就可以塗上一層薄薄的白醋~

跟住用豬皮插不停插豬皮~

再介幾刀~

之後就用黑椒及葱頭醃豬手(份量就因應個人口味啦)，記得底面兩邊都要醃~

將豬手直接放入雪櫃(不用包保鮮紙，因為抽干豬皮水份)，醃最少30分鐘，等啲豬手入味啲~

用光波爐以200度光15分鐘~

反轉後再灑少少黑椒，再光多15分鐘~

光波黑椒豬手出爐啦~

慢慢切嚟食，味道都唔錯呀~

我地都覺得除左個皮唔夠脆之外，基本上同外面食嘅味道都真係差唔多，都算係有水準之作啦！

不過，其實整嘅過程又真係需要幾長時間，今次都用左差唔多一個下午，所以我想....如果再整，都真係要等我好有心情先啦....哈哈哈！