尋晚發夢,有個朋友個表姐喺台中開咗間SPA,叫咗我哋過去玩,夢裏面台中好靚,間spa中等規模,好四正。我同朋友決定喺台灣搞啲小生意。

我好鍾意香港,點解發夢都要離開香港?

好多人話,台灣同香港,都係我睇你好,你睇我好。其實台灣點都唔及香港靚。但係,香港係一個趕人走嘅地方。

我好鍾意用遊客嘅眼光睇返自己屋企,其實香港真係好靚。如果大家都用遊客眼光去睇,香港絕對係全球數一數二嘅「美麗城市」。

但係點解香港住得咁唔舒服?

呢十年嚟全香港人都有錢咗好多,買嘅食嘅都係貴嘢。但係,我哋越嚟越冇「生活」。呢啲真係人類所追求嘅幸福咩?

二十年前,「搞啲小生意」係腳踏實地,只要有一門手藝就可以自力更生;而家,「搞啲小生意」係不切實際,冇咁大個頭唔好戴咁大頂帽。

二十年前,放工可以選擇happy hour、睇電視、打牌、秘撈、學一門手藝、實現夢想;而家,「放工」已經唔存在。而我哋嘅工作,又唔見到好有意義。即係話,我哋嘅人生,就係冇意義。

呢個真係我哋想要嘅屋企?

原文:


 我好鍾意香港,點解發夢都要離開香港?

 https://www.facebook.com/myblogs.asia