一向喜歡地道食品嘅我，有一日係西灣河四圍閒逛時就見到有間兜踎茶檔，就坐低叫咗碗平常不過的餐蛋麵。老闆係一名大隻仔，望落有幾分似宇宙最強丹爺！等咗一陣，阿言（大隻仔）就拎咗碗麵出嚟，一望已經暗叫：ＯＫ喎！塊餐肉都有煎過架，再夾起塊餐肉睇吓，簡直滾動到喊，因為兩面都有煎過架，而且唔係求其煎兩下咁！平日去開Ｄ茶餐廳，塊餐肉唔係凍嘅已經好好，煎一面已經皇恩浩蕩，阿言竟然咁好心機！？夾埋Ｄ麵食，真係正到無朋友，比起果Ｄ乜乜園，ＸＸ冰室同上市茶仔，阿言嘅麵真係好味百倍。因為麵入味得嚟，唔會太淋，而且個麵唔係散開哂，又夠熱，絕對唔係果Ｄ求其烚下放入碗，再落粉同水嘅茶仔可以相比。
今個星期特登帶埋朋友去試下個宇宙最強餐蛋麵，點知阿言話要試下佢個蛋包飯同撈麵，心諗：乜料呀？就咁煎蛋包住Ｄ飯都無咩特別，唔係好想試喎！阿言見我猶疑，立即話佢Ｄ蛋包飯係放好飯係碟，再放蛋跟住用刀切開有蛋汁流出嚟個種，同係Facebook流傳果個一樣。好！既然佢咁有信心，就一個蛋包飯一個撈麵喇！
個蛋包飯上枱時已經切開左，上面Ｄ蛋汁已經包住個飯，上面再淋上阿言特制日式咖哩汁，真係好好味呀！阿言控制個火候剛剛好，睇相都見到仲有Ｄ蛋汁係到流出嚟。日式咖哩汁係阿言特別調制，同出面唔同，而且更好味！個飯原來唔係一般白飯，係有雞肉同調咗味嘅飯。嘴刁嘅朋友一試就講，個飯有Ｄ似糯米，好食。一問之下先知原來阿言托朋友買入嘅米係超一級靚米，比一般餐廳用嘅米貴２倍，加上阿言用特別方法炮製先會有少少黏既口感。
到個撈面上枱，原來係豬腩肉撈麵。豬腩肉煎香，配上洋蔥汁一Ｄ都唔覺得肥膩，聞已經好香，加埋個麵好正！唔講齋睇個賣相仲以為係炒丁麵，因為細心嘅阿言係撈好個麵先上碟，一Ｄ都唔似係撈麵！
不過先旨聲明，各位有興趣去試嘅朋友一定要有等嘅準備，因為每樣出品都係阿言親自即場煮，唔等得的朋友，千祈唔好去，例如我今次，食完個蛋包飯，個麵先上枱，等左足足２０－３０分鐘！仲有要去就要早少少，好多時到下午１點左右已經無哂午餐肉！大家亦唔好諗住外賣，因為外賣就唔好食，一定要即場食先好味。
阿言茶檔：
地址：西灣河太富街華記士多
營業時間：７：３０ － １４：３０ （大約）
