滔滔的感觸去又來

尋日有個後生同事問我：

「有冇睇大時代呀？」

「我罷睇TVB好耐喇。」

「真係好正喎。」

「我知。」

其實，近幾年已經冇時間睇電視，而且TVB啲節目太垃圾，冇興趣睇。但係罷睇，係特登唔睇，黃子華都唔睇。原因係TVB太無恥。

我當然知道大時代係好嘢啦。我睇首播咖。

我係飲TVB奶水大、食電視汁撈飯大嘅。我幼稚園就已經晚晚睇歡樂今宵；誓不低頭集集追；港姐、台慶、東華、勁歌係要mark定日曆唔約人留喺屋企睇嘅。記得有次去人哋屋企打機（唔記得親戚朋友定同學），人哋呀媽見我哋玩得開心，叫我玩耐啲，我話唔得，因為要趕返屋企睇大結局。

大時代係五年級事。當時追大時代已經係瘋狂。唔單只要睇大時代，仲要睇埋「大時代搵大錢」抽獎遊戲。每日估下係譚詠麟定鄭少秋唱主題曲。雖然兩首都好好聽，但係都係想聽巨浪多啲。仲要背埋股票必勝法，返學校問同學知唔知「離家飲煉奶，落雨去離島」點解。諗起都覺得覺得癲。

喺Facebook見到有學生讚藍潔英靚女，識嘢。佢哋唔止靚。當時啲靚女唔可以靠扮可愛就過骨，藍潔英、李麗珍、郭靄明個個都靚女，個個都交足戲。我最憎人發效同扮可愛，就算樣靚都好憎。可能就係因為我細個睇開嘅靚女，靠樣冇腦係一文不值。而家女性學歷一定高過以前啦，但係以前港姐嘅美貌與智慧並重係堅嘅。你睇郭靄明就知。

成日話細路睇得電視多會蠢。睇你睇邊啲啦。如果你日日學曾江、劉青雲、黃日華、萬梓良講嘢，轉數點會慢？幾多廣東話嘅文藝技巧就係靠睇電視學返嚟。而家你睇到嘅乜？係許紹雄畀車撞到嘔血，仲自己搭車返屋企；馬國明醫生畀車撞親個頭，醫生老婆楊怡問人借條絲巾喺佢個頭度縛個結就當急救。睇得多點會唔低B？真係喊出嚟。

但係喊都冇用，韶華去了未再來，哭千聲哭不回現在。剩低嘅，只有滔滔的感觸去又來。

P.S.香港嘅未來，就係靠魔童喇。

原文：