【自家製】光波砵仔蠔

前幾日去書店打書釘時見到依個菜式，睇落又好似好簡單咁，所以趁今日齊齊返爸爸屋企食晚飯，所以就試下整光波砵仔蠔俾大家食啦~

整光波砵仔蠔所需要嘅材料~

我今次係759買左一包韓國急凍中size蠔，大約用半包左右。解凍把已解凍的蠔放在器皿內，以粟粉輕輕手咁洗刷表面的污垢~

之後沖水後用筲箕盛起~

洗完啲蠔仔即刻白雪雪呀~

果皮1塊浸軟切幼絲、蔥切小粒、半舊薑剁成薑蓉~

油炸鬼切件備用~

先準備煮滾一鍋水，下蠔灼大約10至15秒後撈起~

雞蛋4隻打勻、加入少少胡椒粉、水4湯匙~

蠔仔乾淨瀝乾，先放入砵中~

然後加入果皮絲、蔥粒及薑蓉~

將蛋液倒進砵中~

最後將切件油炸鬼鋪在上面~

將低架放入光波爐，再將焗盤放入，以220度焗20分鐘~

一碟看似好難，但其實做落好簡單嘅光波砵仔蠔已經完成啦~

用依個方法焗蛋，啲蛋都唔會老，加埋啲蠔仔，味道都唔錯。不過我就最鐘意面頭啲油炸鬼，焗完之後脆卜卜，好好味呀~

哈哈哈...不過依碟餸大家嘅口味就唔一致啦，小小豬爸爸因為唔愛食蠔(生蠔除外)，所以佢就話麻麻地。

但愛好食蠔嘅LULU妹就讚口不絕，基本上都係佢幫我清晒，仲叫我下次再整過俾佢食呀！