【自家製】雪梨海底椰雪耳豬展湯

尋晚突然間好想飲湯，當然夜間又點會有碗湯變出嚟呀！

所以今朝起身就去買材料，煲個潤肺止咳又滋潤嘅雪梨海底椰雪耳豬展湯，等我地三口子潤一潤佢~

實係屋企仲用剩左啲雪梨乾、海底椰同雪耳，所以只係買啲豬展就可以煲到啦~

雪耳浸透，用剪刀剪去硬蒂，撕成小朵後備用~

其他材料浸洗後備用~

豬展洗淨，然後汆水~

煲內放約3L水，滾起後加入豬展及其他材料~

 先用猛火煲半小時~

之後轉用慢火，再加煲一個半小時~

最後下鹽調味，可以飲得啦~

我地係第一次用雪梨乾嚟煲湯，估唔到個味同新鮮雪梨煲嘅都係一樣，加上今次又加左雪耳一齊煲，所以啖湯真係特別潤，就連小小豬都飲左兩大碗呀！

雖然雪耳係好味又有益，不過都要再提多大家煲過嘅雪耳一定要即日食/飲晒，如果隔夜，經過一夜嘅浸透，佢就會放出一啲有害物，到時就有益變有害啦！