OT等同多野做?

Sweetie以前做嗰間大大公司，話晒係喺香港有領導地位嘅金融公司，所以工作算係繁忙。不過都只限在於辦工時間，一般都唔需要OT。朝9晚6，頂多都只係7點鐘就走人。

不過好奇怪，同Sweetie同team嘅一個秘書姐姐P小姐，經常性都會喺8點先走。由於Sweetie都會幫佢手做野，所以走嘅時候同P小姐講bye bye時都有啲唔好意思。於是，Sweetie就每次走嗰刻都會問P小姐有冇野需要幫手? P小姐就灑手擰頭咁講「得啦 ！ 你走先啦，我自己搞得掂架啦。」

出面亦都好多同事幫P小姐出聲「嘩，P小姐老闆咁衰架，比咁多野佢做。」「P小姐真係勤力，成日OT都冇怨言，佢條team個Sweetie都唔幫下手」Sweetie聽入耳當然好唔憤氣啦，主動出聲幫佢，佢話唔洗我都冇辦法架。有一日Sweetie真係要OT過7點，無意中就見到P小姐個mon有啲唔對路。雖然P小姐成枱都係公司文件，亦做到冇停手，但原來喺電腦做私人嘅野。到8點鐘，P小姐接咗個電話「你收工啦？咁我而家都走啦。」

真相終於大白，原來P小姐一直OT唔係忙公事，而係等佢老公收工。但佢就會放晒公司文件喺枱面令人以為佢OT係做緊公事。雖然喺公司OT係冇津貼，但可以等老公嘅時候又唔洗周街逛，最緊要係羸埋同事話佢勤力嘅讚賞，真係一石二鳥。不過就令到Sweetie同P小姐個老闆比人講咗唔少閒話。